«Саханефтегазсбыт» үлэһиттэрин дьиэ кэргэттэригэр болҕомтотун уурар

«Саханефтегазсбыт» АУо салалтата уонна биир идэлээх сойуустарын кэмитиэтэ үлэһиттэрин дьиэ кэргэттэрэ сайын сынньаналларыгар уонна доруобуйаларын чэбдигирдинэллэригэр өйөбүлү оҥорор.

Оҕолор сайын Владивостокка «Океан» уонна Хаҥаласка «Булуус» лааҕырдарга сынньаналлар.

«Океан» лааҕырга 21 оҕо икки симиэнэнэн сынньанар, «Булууска» – 23 оҕо үс симиэнэнэн. Бу күннэргэ бастакы симиэнэ оҕолоро «Океантан» кэллилэр.

«Саханефтегазсбыт» АУо генеральнай дириэктэрэ, СӨ норуодунай дьокутаата Виктор Лебедев тэрилтэ үлэһиттэрин оҕолоро сыл ахсын «Океаҥҥа» астына, дуоһуйа сынньаналларын бэлиэтиир. Лааҕырга хас биирдии оҕо бэйэтэ сөбүлүүр дьарыгар ылсар. Дьиэлэригэр кэлэн үөрүүлэрин үллэстэллэр уонна эһиилги сылга сынньалаҥнарын былаанныыллар.

Хаҥаласка «Булууска» сынньанар оҕолор эмиэ олус астынан, дуоһуйа сынньанан кэлэллэр. Саха сирин биир саамай кэрэ, ураты сиригэр турар лааҕыр умсугутара да элбэх. Билигин атырдьах ыйыгар барыахтаах симиэнэ оҕолоро тэһийбэккэ-тулуйбакка күүтэллэрин этэр Виктор Николаевич.

—Биһиги үлэһиттэрбит оҕолоро, ол иһигэр арктическай филиаллартан, үөрэ-көтө сынньаналларыттан, саҥаҕа, сонуҥҥа, туһалаахха үөрэнэллэриттэн, дьоҕурдарын арыйалларыттан, дойду уонна өрөспүүбүлүкэ бастыҥ лааҕырдарыгар сылдьан саҥа доҕоттордоноллоруттан үөрэбит, — диир кини.  Кэнники биэс сылга курдук, быйыл эмиэ Орто Халыматтан, Баатаҕайтан, Нагорнинскайтан, Дьокуускайтан, Уус Куйгаттан, Хаандыгаттан, Аллараа Бэстээхтэн, Дьокуускайтан тэрилтэ үлэһиттэрин оҕолоро көхтөөхтүк сынньаммыттар.

Хампаанньа үлэһиттэрин дьиэ кэргэттэригэр социальнай өйөбүлү тиһиктээхтик оҥорор. Тэрилтэ уонна биир идэлээх сойуустар кэмитиэттэрэ төрөппүттэргэ оҕолор сынньалаҥнарын сорох чааһын толуйар, онтон элбэх оҕолоох дьиэ кэргэттэргэ путевка аҥаарын кэриҥин эбэтэр толору сыанатын толуйар. «Булууска» путевканы «Саханефтегазсбыт» элбэх оҕолоох үлэһиттэригэр толору төлүүр, ол улахан көмөнөн буолар.

Ону таһынан, төрөппүттэр бэйэлэрэ оҕо доруобуйатын чэбдигирдэр лааҕырдары кытта дуогабардаһаллар, ирдэнэр докумуоннарын биэрдэхтэринэ, ороскоуттарын сорох чааһа барыларыгар төлөнөр. Ол эбэтэр тэрилтэ өттүттэн өйөбүл баҕалаахтарга барыларыгар оҥоһуллар.

Төрөппүттэр «Саханефтегазсбыт» АУо генеральнай дириэктэригэр, СӨ норуодунай дьокутаатыгар Виктор Лебедевка махталлара муҥура суох. Кини бэйэтин көҕүлээһининэн, бэйэтин тус харчытыттан Дьааҥы оҕотун айанын төлөбүрүн төлөөбүт. Бу оҕо аҕата Баатаҕай нефтебаазатын хочуолунайыгар оператордыыр, дьиэ кэргэн 5  оҕолоох. Бу курдук уустук суоллаах-иистээх ыраах хотугу улуустартан оҕолор сынньалаҥнарыгар уонна доруобуйаларын чэбдигирдинэллэригэр улахан болҕомто ууруллар.

Хампаанньа үлэһиттэр дьиэ кэргэттэрин өйүүр бырагырааматын сайыннарыыны салгыыр. Үлэһиттэргэ да, оҕолоругар да табыгастаах усулуобуйаны тэрийэргэ туох кыалларын барытын оҥорор.

Хампаанньа үлэһиттэрэ икки сылга биирдэ Арассыыйа ханнык баҕарар доруобуйаны чэбдигирдэргэ аналлаах санаторнай-курортнай сынньалаҥнарыгар тэрилтэттэн төлөбүрүнэн туһаналлар.

«Саханефтегазсбыт» АУо үлэһиттэригэр уонна кинилэр оҕолоругар сайыҥҥы сынньалаҥы уонна чэбдигирдиини уратытык өйөөһүнэ уонна тэрийиитэ холобур буолар.

«Саханефтегазсбыт» АУо пресс-сэкиритээрэ Яна Байгожаева