«Саханефтегазсбыт» ыраах сытар нэһилиэктэри ньиэп бородууктатынан хааччыйда

«Саханефтегазсбыт» АУо 2025 сылга  ыраах сытар, сылы эргиччи суола-ииһэ суох, автозаправочнай  (АЗС) уонна контейнернай автозаправочнай станциялара (КАЗС) суох нэһилиэнньэлээх пууннары ньиэп бородууктатынан хааччыйда.

Бу туһунан бүгүн Ил Дархан  Айсен Николаевка хампаанньа 2025 с. үп-хаһаайыстыбаннай үлэтин барыллаан түмүктэрин уонна 2026 с. былаанын туһунан отчуоттуур сүбэ мунньахха дакылааттаатылар.

«Өрөспүүбүлүкэ бөдөҥ  логистическай предприятиета төһө да ыарахаттар баалларын үрдүнэн, сылы этэҥҥэ түмүктээтэ. Хоту оройуоннарга анаан ньиэп бородууктатын  толору ылылынна. СӨ Бырабыыталыстыбатын сорудаҕынан, «Саханефтегазсбыт» ньиэп бородууктатын ырыынагар тахсар халбаҥнааһыны туормастыырын таһынан, өрөспүүбүлүкэни тохтоло суох уматыгынан хааччыйар», — диэн  Айсен Николаев бэлиэтээтэ.

2025 сылга эбийиэктэри саҥардан оҥоруу салгыы ыытыллыбыт.  Манчаары оонньууларын көрсө Ытык Күөл бөһүөлэгэр 71 нүөмэрдээх АЗС саҥардан оҥоһуллубут. «Дьокуускайдааҕы нефтебаза» филиалын резервуарнай пааркатыгар икки түһүмэхтээх техническэй саҥардыы үлэтэ саҕаламмыт. 2025 с. 15 нефтебазаҕа ньиэп бородууктатын харайар 94   резервуарга хапытаалынай өрөмүөн ыытыллыбыт.

«Биһиги үлэбит бары социальнай эбэһээтэлистибэлэри  толорон туран, үп-харчы туруктаах буолуутун хааччыйыыга туһуланыаҕа», — диэн мунньахха «Саханефтегазсбыт» АУо генеральнай дириэктэрэ Виктор Лебедев эттэ.

Көрсүһүү түмүгэр, Ил Дархан  “Саханефтегазсбыт” АУо хамаандатыгар ааспыт сыл устата ситиһиилээх үлэлэрин иһин махталын биллэрдэ. Ил Дархан  байыаннай дьайыы кыттыылаахтарыгар  хампаанньа сүҥкэн көмөтүн бэлиэтээтэ.