Саһарбыт страницалар: 80 сыл анараа өттүгэр

80 сыл анараа өттүгэр, ыам ыйын 9, 10 күннэригэр, “Кыым” хаһыакка тугу суруйбуттарай? Бу суруйуулары бүгүн үгүс киһи интэриэһиргиир, сэҥээрэр буолуохтаах.

Хаһыат ыам ыйын 9 күнүнээҕи нүөмэрин бастакы балаһатыгар холкуостарга үлэ хаамыытын, нуучча биллиилээх учуонайа араадьыйаны айбыта 50 сылыгар анаан суруйуулар итиэннэ И. В. Сталин бирикээһэ уонна Сэбиэскэй Информбюро иһитиннэриилэрэ бэчээттэммиттэр.

СОВЕТСКАЙ ИНФОРМБЮРОТТАН

— 1 ы Белорусскай фронт сэриилэрэ МАГДЕБУРГ, хоту уонна соҕуруулуу-илин өттүлэринэн Эльба өрүскэ тиийдилэр, итиниэхэ ГЕНТИН, ЦЕРОСТ куораттары уонна нэһилиэнньэлээх ШЕНХАУЗЕН, БЕРГЦОВ, ПАРЕЙ, ШАРТАУ, ГЕРВИШ, ЛЕЙТЦКАУ, ГЕРДЕН, ВАЛЬТЕРНИНБУРГ, ШЮЙТЦ диэн бөдөҥ пууннары ыллылар. Ыам ыйын 6 күнүгэр фронт сэриилэрэ 3.100 немецкэй саллааты уонна эписиэри билиэн туттулар уонна аэродромнарга өстөөх 34 сөмөлүөтүн ыллылар.

Ыам ыйын 10 күнүгэр “Кыым” бастакы сирэйигэр Улуу Кыайыы туһунан үөрүүлээх иһитиннэрии тахсыбыт.
— Доҕотторбуот, тиһэҕэр тиийэн, көһүтүүлээх күммүтүн дьэ көрдүбүт. Биһиги кырдьыкпыт, биһиги болоппут кыайда. Дьулуурбут өрөгөйдөөх түмүгүн дьэ буллубут. Икки атахтаах историятыгар caҥа дьол тосхойдо, кини улуу мындаатыгар кыайыы ырайа тыкта. Кини кэрэ-дьикти сырдыга сир үрдүнэн тэнийэ сыдьаайда. Бу буолан ааспыт улуу охсуһууга тохтубут хааммыт өлбөт күүстээх символа — Кыһыл былаах Ийэ дойдубут үрдүнэн дьэргэйэ тэлээрдэ. Кыайыы уонна үөрүү былааҕа. Үөрүү.