Андрей Сорокин хаартыската
Өрөспүүбүлүкэ иһигэр 2023 с. баһаар сезона уустук күн-дьыл туругун уонна баһаар ахсаана элбэҕин үрдүнэн, сөптөөх таһымнаахтык ааста. Бу туһунан бүгүн Ил Дархан Айсен Николаев Саха сиригэр баһаар сезонун түмүгүн таһаарар мунньахха эттэ.
Кини эппитинэн, баһаар сезонун ситиһиилээхтик түмүктүүргэ сулууспалар суһаллык хамсаныылара, харыстанар ойуур иэнэ кэҥээбитэ уонна сэрэтэр үлэни ыытыы улахан оруолу ылбыт. Айсен Николаев өрөспүүбүлүкэ олохтоохторун аатыттан уоту кытары охсуһааччылар ойуур харыстабылыгар эҥкилэ суох, ардыгар олохторугар даҕаны улахан кутталлаах ыарахан үлэлэрин иһин махтанна.
«Ойуур харыстабылыгар кыттыбыт араас таһымнаах – федеральнай, эрэгийиэннээҕи, муницпальнай сулууспалар уонна структуралар бары көдьүүстээх бииргэ үлэлээһиннэрин түмүгэр бу баһаар сезонугар сөптөөхтүк дьоһуннаахтык түмүктээтибит. Быйылгы сезон олус чэпчэкитэ суох этэ. Ааспыт сыллааҕар балтараа төгүл элбэх баһаар турбута. Бэс ыйыгар олус куйаас күннэр турбуттарын өйдүүбүт. От уонна атырдьах ыйдарыгар ойуурга үрдүк кылаастаах баһаар тахсар куттала баар этэ. Сорох оройуоннарга олох аҕыйах сөҥүү түспүтэ», – диэтэ Айсен Сергеевич.
Кини, Уус Маайа, Алдан, Өлүөхүмэ оройуоннарыгар ыарахан балаһыанньа үөскүү сылдьыбытын бэлиэтээтэ.
Ойуур баһаарын умуруорууга 10 тыһыынча кэриҥэ киһи, ол иһигэр 1700-н тахса олохтоох дьон үлэлээбиттэрэ. Улахан баһаардар турбут сирдэригэр көмөҕө атын эрэгийиэннэртэн баһаарынайдар кэлэн көмөлөспүттэрэ. «Эһиги хас биирдиигит туруоруллубут соругу, бэйэҕит эбээһинэскитин эппиэтинэстээхтик уонна эҥкилэ суох толордугут. Эһиги бары бииргэ үлэлииргитин, хардарыта көмөлөһөргүтүн, бэриниилээххитин уонна күүстээх санаалааххытын көрдөрдүгүт», – диэтэ Айсен Николаев.
Ил Дархан ойуур баһаарын космостан кэтээн көрүү билэрдик тупсан, саҥа тэнийэн эрэр баһаары эрдэ буларга уонна суһаллык дьаһанарга кыаҕы биэрдэ диэн бэлиэтээтэ. Бу хайысха өссө даҕаны күүһүрүөҕүн эттэ.
«Сыл аайы сүрүннээн ойууру харыстыыр уонна баһаары умуруоруу кэлим үлэтэ түмүгүн көрдөрөр буолан иһэр. Манна хас биирдиибит кылаата баар. Мин эрэнэбин, манан тохтоон хаалыахпыт суоҕа. Бэйэбит идэбит таһымын мэлдьи үрдэтиэхпит, кэлэр сылга баһаар сезонугар эппиэтинэстээхтик сыһыаннаһыахпыт, федеральнай тэрилтэлэри кытары бииргэ үлэлэһиэхпит», – диэн түмүктээтэ Айсен Николаев.
Бүгүҥҥү тэрээһин чэрчитинэн, Саха сирин уоту кытары охсуһааччыларыгар наҕараадалары туттардылар диэн иһитиннэрэр СӨ Баһылыгын уонна бырабыыталыстыбатын пресс-сулууспата.
Ааспыт сууккаҕа Саха сиригэр буруйу оҥоруу сэттэ түбэлтэтэ тахсыбыт. Манан процессуальнай бэрэбиэркэни ыытыыны уонна холуобунай…
«Якутскэнерго» ПАУо өрөспүүбүлүкэ олоҕо-дьаһаҕа бигэ туруктаах буолуутугар уотунан-сылааһынан хааччыйар дьоһун суолталаах тэрилтэнэн буолар. Хампаанньа генеральнай…
Бүгүн, тохсунньу 11 күнүгэр, өрөспүүбүлүкэ соҕуруулуу-арҕаа, хотугулуу-илин, илин өттүгэр кыралаан хаардыаҕа. Киин, арҕаа оройуоннарга туманнаах…
Бүгүҥҥү күн – наҕыл, сымнаҕас уонна дьиэҕэ-уокка чугас дьону кытта сынньанарга табыгастаах кэм. Ый Оҕус…
Бүгүн, тохсунньу 10 күнүгэр, биллиилээх суруналыыс, уопсастыбаннай диэйэтэл, РФ суруналыыстарын сойууһун, РФ уонна СӨ суруйааччыларын…
Саха сирин олохтоохторун төлөпүөнүнэн түөкүннээһин саҥа, кутталлаах көрүҥэ тарҕаммытын туһунан сэрэттилэр. Түөкүттэр военкомат аатыттан эрийэн,…