Саха сирин олохтоохторо Ил Дархан быһа эпииригэр ыйытыыларын ыыталлар

Ил Дархан Айсен Николаев “Быһа эпииригэр” ыйытыылары ылыы салҕанар. Билиҥҥитэ өрөспүүбүлүкэ олохтоохторуттан 350-тан тахса ыйытыы киирдэ.

«Элбэх ыйытыы суол уонна тырааныспар, тутуу уонна тупсарыы, Дьиэ-уот, коммунальнай хаһаайыстыбата  уонна энергетика, олорор  дьиэ-уот, хаарбах дьиэттэн көһөрүү, доруобуйа харыстабылын, социальнай көмө уонна үлэ, үөрэхтээһин, тыа хаһаайыстыбатын, сибээс уонна интэриниэт, экология, сыана, урбаан уонна экэниэмикэ тиэмэлэригэр киирдэ. Ордук көхтөөхтүк Дьокуускай, Ленскэй, Алдан, Мииринэй, Өлүөхүмэ, Сунтаар, Ньурба, Нерюнгри, Томпо, Уус Алдан, Мэҥэ Хаҥалас уонна Хаҥалас, Арктика улуустарыттан Анаабыр, Үөһээ Халыма уонна Орто Халыма улуустара көхтөөхтүк ыыттылар”, — диэн ЦУР салайааччыта Василий Десяткин иһитиннэрдэ.

Кини кэпсээбитинэн, быһа эпиир биир сонун көстүүтүнэн олохтоохтор видеонан ыытар ыйытыылара буолуоҕа. Колл-киин суукканы быһа үлэлиир. Киирбит ыйытыылар былаас тустаах уорганнарыгар ыытыллаллар.

Санатан эттэххэ, Ил Дархан Айсен Николаев “Быһа эпиирэ” Өрөспүүбүлүкэ күнүгэр, муус устар 27 күнүгэр 18.00 чаастан  «НВК Саха», «Якутия 24», «Россия 24» тэлэбидиэнньэ ханаалларыгар, «Тэтим», «Радио России», «Виктория Саха», «СТВ-радио» уонна социальнай ситимнэргэ буолуоҕа.

Ыйытыылары уонна этиилэри эрдэ: 8 (4112) 506-006 нүөмэргэ эбэтэр Telegram: @voprosGlaveYakutii_bot ыытыахха сөп.