Саха сирин психологтара байыаннай госпиталларга үлэлииллэр

Өрөспүүбүлүкэ психологтара Уһук Илин уокурук уонна Ростов байыаннай госпиталларыгар үлэлииллэр. Ол туһунан Өрөспүүбүлүкэтээҕи суһал ыстаап брифинигэр Саха сирин психологическай киинин дириэктэрэ Владимир Скрябин кэпсиир.

«Байыаннай госпиталларга сытар бааһырбыт байыастарбытын кытары үлэ көдьүүстээҕин биһиги исписэлиистэрбит этэллэр. Ол курдук, уолаттар бастаан эчэйиини ылан киирэн баран, психологтар үлэлэһэннэр, кэлин туруктара тупсарын бэлиэтиир буоллубут. Бастаан киирэллэригэр уолаттар быраҕыллыбыт, өйө-санаа өттүнэн сылайбыт курдук буолаллар, дьону кытары кэпсэтэ сатаабаттар, бэйэлэригэр бүгэллэр. Психолог үлэлэспитин кэннэ арыллаллар, итэҕэйэр, бэйэлэрин санааларын үллэстэр буолаллар. Ол уйулҕа өттүнэн чөлгө түһүүгэ бастакы хардыы буолар», –  диир Владимир Скрябин.

Киин үлэһиттэрэ анал байыаннай дьайыылар саҕаланыахтарыттан дьоҥҥо 600-тэн тахса сүбэни-аманы биэрдилэр, ол иһигэр байыаннай сулууспалаахтартан 300-чэ.