Ньурба Хорулатыттан төрүттээх-уустаах, кикбоксиҥҥа Европа икки, аан дойду икки төгүллээх чөмпүйүөнэ, РФ спордун үтүөлээх маастара Василий Васильевич Васильев төрөппүт уола Петр Васильев аҕатын “туйаҕын хатаран”, балаҕан ыйын 16 күнүгэр, Москваҕа цииркэ уораҕайыгар буолан ааспыт профессионал боксердар “Wild Boxing” турнирдарыгар күүстээх утарсааччытын, профессиональнай боксаҕа 25 киирсибит улахан титуллаах боксеру Павел Маликовы маҥнайгы рауҥҥа иккитэ нокдаун уонна бүтэһигэр нокаут ыыталаан итэҕэтиилээхтик хотто.
Кыайыы көтөллөөх Дьокуускайга кэлээтин кытта, сахаттан бастакы уонна соҕотох профессионал-боксерга аналлаах пресс-конференцияҕа Петр Васильевы кытта спорт салайааччылара – Саха Өрөспүүбүлүкэтин успуорка миниистирэ Леонид Спиридонов, Дьокуускай куорат физическэй култуураҕа уонна успуорка управлениетын начаалынньыга Эдуард Ефимов, итиэннэ, суруналыыстар көрүстүлэр. Пресс-кэмпириэнсийэҕэ боксер төрөппүт аҕата, РФ успуордун үтүөлээх маастара Василий Васильевич Васильев эмиэ кыттыыны ылла.
Петя оҕо сылдьан биллиилээх бөҕөс, тириэньэр Василий Егорович Стручковка тустуунан дьарыктанан баран боксаҕа көһөн, аҕатын көрүүтүгэр-истиитигэр киирбит. Үтүөлээх тириэньэрдэргэ Михаил Георгиевич Вальга, Артур Иннокентьевич Пахомовка эрчиллибитэ.
Успуорка дьоҕурдаах уолга ситиһиилэр өр кэтэһиннэрбэтэхтэрэ. Оҕолорго Арассыыйа чөмпүйүөнүнэн буолары ситиспитэ. Амурдааҕы физкултуура иснтитутугар устудьуоннуур сылларыгар тириэньэр Сергей Иванович Гондуркаевка буоксанан салгыы дьарыктаммыта. Любительскай боксаҕа Уһук Илиҥҥэ сэттэтэ чөмпүйүөннээбитэ. Саха Өрөспүүбүлүкэтин уонна Аммаҕа Саха сирин норуоттарын спортивнай оонньууларын чөмпүйүөнэ. “А” кылаастаах Коротков норуоттар икки ардыларынааҕы улахан турниры үстэ кыайда. Испанияҕа иккис буолбута. Буоксаҕа норуоттар икки ардыларынааҕы кылаастаах успуорт маастарын икки төгүл толорору ситистэ. Киниэхэ хотторбут казах уола Олимпийскай оонньууларга үһүс миэстэни ылбыта да Петр Васильев үчүгэй боксер буоларын итэҕэтэр.
Оҕо эрдэҕиттэн профессионал-боксер буолар баҕа санаалаах буолан, 2019 с. профессионаллар рингэлэригэр көспүтэ. Гонорара үчүгэй. Уон рауннаах киирсиигэ Турция рингэтигэр аан маҥнайгытын тахсыбыта уонна Фарух диэн утарсааччытыгар үһүс рауҥҥа суоһарыылаах охсууну оҥорбутугар күөн көрсүһүүнү эрдэ тохтоппуттара. Таилаҥҥа “Хоруол Кубогын”, Соҕуруу Кореяҕа, Хотугу Кореяҕа, Казахстаҥҥа, Албанияҕа, Турцияҕа буолуталаабыт турнирдары кыайталаабыта. Ломаченко, Хейни курдук аатырбыт профессионаллартан холобур ылар. Рингэҕэ ыраатар, үүнэр-сайдар туһугар анаан-минээн омук тылын үөрэтэр.
Профессиональнай бокса рингэтигэр алтата тахсан барыларыгар дьоһуннук кииристэ. Буокса эйгэтигэр нокаутерунан биллэр.Балаҕан ыйыгар Москваҕа аан дойдуга биллэр бэһис таһымнаах уонна рейтиннээх турниры кыайан Петр Васильев Москваҕа баар професионаллар хамаандаларыгар ылылынна. Үөрүүнү кытта ытыстарын үрдүгэр түһэрэн ыллылар. Онон титуллары ылар туһугар салгыы өссө күүскэ дьарыктанарыгар улахан кыахтар баар буоллулар. Профессиональнай бокс эйгэтигэр улаханнык билиниллэр уонна ытыктанар, профессиональнай бокс ис куукунатын дириҥник билэр, Америкаҕа уон сыл олорон үлэлээбит, Георгий Чебоксаев, Боту Хасиков курдук ММА күүстээх боксердарын таһаартаабыт Андрей Владимирович Левчук диэн тириэньэргэ мантан ыла эрчиллиэҕэ. Профессионаллар хамаандаларыгар ирдэбил кытаанах. Тренердэр эрчийэр спортсменнарын бары өттүнэн барытынан — тылгын-өскүн, таҥна-сапта сылдьаргын, тутта-хапта сылдьаргар, дьоҥҥо сыһыаҥҥар тиийэ көрөллөр. Эргиччи сайыннараллар. Аан дойду “сулустарын” кытта бииргэ дьарыктаныы күүтэр.
Профессионаллар хамаандаларыгар киирбитинэн Петр Васильев ыра санаата туолан, олоҕор биир сүрүн сыалын толорбутунан, бэйэтин дьоллооҕунан ааҕынар. Үүнэр-сайдар баҕата наһаа улахан.
Ситиһии, кыайыы кэлэрин туһугар, Петр Васильев тугу барытын хаалларан туран, олус күүскэ дьарыктанар. Хотторорун сөбүлээбэт. Тириэньэрдэрэ биэрэр сорудахтарын аһары толорор. Бэрээдэги, эрэсиими эҥкилэ суох тутуһар. Онуоха, кытаанах, сынтарыйбат сааата, майгыта-силигитэ, бэйэтигэр эрэллээҕэ туһалыыллар. Буокса улахан фаната. Үлэлиирин, дьарыктанарын олус сөбүлүүр. Эппитин, эрэннэрбитин толорорго кыһаллар. Дьон олорор сириттэн тэйиччи, иһирик ойуурга, чуумпуга, Иккилии көс сири кросс сүүрэр. Иллэҥ кэмэ суоҕун кэриэтэ. Арай, дьиэтигэр кыракый кыысчаанын кытта бадьыыстаһарын сөбүлүүр. Ол туһунан сүргэтэ көтөҕүллэн төһө баҕарар кэпсиэн сөп.
Петр Васильев инники сыала-соруга элбэх, өссө күүскэ үлэлиир, эрчиллэр бигэ санаалаах. Өссө да эбиллэр кыахтара, сатаабаттара баарын билэр. Спортсмен ситиһиитэ, тахсыыта тириэньэртэн тутулуктаах диэн ааҕар. Онон Москваҕа профессионаллар хамаандаларыгар ылбыттарыттан астынарын, үөрэрин биллэрэр. Сэтинньи ый бүтүүтүгэр профессионаллар рингэлэригэр тахсыы күүтэр. Онтон, титул ыллаҕына рингэҕэ киирсэрин тохтотон, саха боксердарын профессионаллар буоксаларыгар киллэрэн, аан дойдуга биллэр-көстөр спортсменнары таһаартыыр санаалаах. Успуорка менеджердэр уонна промоутердар оруоллара уонна суолталара улаханын тоһоҕолоон бэлиэтиир. Дьокуускай куорат мээригэр Евгений Григорьевка уонна өрөспүүбүлүкэ успуорка миниистиригэр Леонид Спиридоновка өйөбүллэрин иһин махталын биллэрэр.
Саха Өрөспүүбүлүкэтин физическэй култуураҕа уонна успуорка миниистирэ Леонид Спиридонов махтал суругу уонна саха быһаҕын туттарда.
Ити курдук, 28 саастаах профессионал-боксер Петр Васильев улахан успуорка бастакы боччумнаах хардыыларын оҥорон эрэр. Хас биирдии спортсмен иннигэр турар сыалы-соругу толороро тус бэйэттэн тутулуктаах диэн ааҕар. Успуорт бу көрүҥэр бэйэтин “аччыгынан” ааҕынар, хайа баҕарар ыарахан сорудаҕы толорорго бэлэм.
Петр Васильевка ситиһии тосхойдун!
Баһылай Посельскай,
Дьокуускай.
Хаартыскалар ааптар тиксэриилэрэ.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…