Сайаапканы хомуйуу саҕаланна

Муус устар 1 күнүттэн бэс ыйын 30 күнүгэр диэри электроннай сэрэбиэйгэ сайаапканы хомуйан саҕалаатылар. Бу туһунан СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин Булт уонна булт баайын харыстааһыҥҥа департаменын салайааччыта Владимир Решетников бу курдук кэпсээтэ:

— Биһиги министиэристибэбит һttps://e‑yakutia.ru СӨ судаарыстыбаннай уонна муниципальнай өҥөҕө порталыгар сэрэбиэйдэһии ньыматынан лимиит олохтонор булт баайыгар (хотугу кыыл табаттан уонна киистэн уратыларга) көҥүлү түҥэтиигэ сайаапкалары ылыы саҕаланна.

Онон булчут биир муниципальнай оройуон сиригэр-уотугар лимиит олохтоммут биир көрүҥү бултааһыҥҥа көҥүлү ылыыга сайабылыанньа биэрэр бырааптаах.

Билиҥҥи туругунан СӨ судаарыстыбаннай уонна муниципальнай өҥөлөргө эрэгийиэннээҕи порталын нөҥүө 4049 сайаапка киирдэ.

Сэрэбиэйдэһии Саха Өрөспүүбүлүкэтин булт баайын лимииттэрин уонна кубуоталарын бигэргэтии кэнниттэн иккис күнүгэр ыытыллар. Онно өрөспүүбүлүкэ Экологияҕа, Инновацияҕа министиэристибэлэрэ уонна булчуттар уонна балыксыттар уопсастыбаннай түмсүүлэрэ кыттыылаах түбэһиэх чыыһылалар электроннай генератордарын туһанан ыытыллар.

Сэрэбиэйдэһии түгэнэ СӨ Экологияҕа министиэристибэтин дьиҥ таһымнаах саайтыгар көрдөрүллүөҕэ. Сэрэбиэйдэһии түмүктэммитин кэннэ сайаапканы биэрбит киһи тус кэбиниэтигэр бу түмүгүн туһунан иһитиннэрии кэлиэҕэ.

Салгыы сэрэбиэйдэһиинэн үчүгэй түмүк ылылыннаҕына, бултуурга лимиит олохтоммут булт баайын бултааһыҥҥа көҥүлү биэриигэ сайабылыанньа СӨ судаарыстыбаннай уонна муниципальнай өҥөлөргө порталын нөҥүө уонна атын көҥүллэнэр ньымаларынан атырдьах ыйын 1 күнүттэн тутуллуоҕа.

Булчут электроннай билиэтэ

2025 сыл тохсунньу 1 күнүттэн “Булт уонна булт баайын харыстааһын туһунан” Федеральнай сокуоҥҥа киирбит уларыйыыларга олоҕуран, булчут билиэтэ электроннай көрүҥүнэн бэриллэр. Ону тэҥэ булчут баҕатынан судаарыстыбаннай былаас ситэриилээх уоргана билиэти кумааҕы көрүҥүнэн эмиэ биэрэр. Булчут электроннай билиэтэ уонна кумааҕыга бэчээттэммит билиэт тэҥ юридическай күүстээхтэр. Бултуур сиргэ суотабай сибээс хаппат буоллаҕына, докумуоннары оффлайн-эрэсииминэн көрдөрүөххэ сөп. Булчут билиэтин ылыан баҕалаахтар суотабай төлөпүөннэригэр “Госөҥө” сыһыарыыны туруоруохтаахтар.

Билиҥҥи туругунан СӨ судаарыстыбаннай уонна муниципальнай өҥөлөргө эрэгийиэннээҕи порталын нөҥүө 4049 сайаапка киирдэ.

Бу өҥөҕө сайаапканы ылыы “Госөҥө” судаарыстыбаннай порталын нөҥүө ыытыллар. Сайабылыанньаны толорооччу Хоту дойду аҕыйах ахсааннаах норуоттарыгар киирсэрин бэлиэтиэхтээх уонна ону туоһулуур докумуоннары киллэриэхтээх.

Ону тэҥэ сайабылыанньаҕа сыһыарыллар хаартыска маннык ирдэбиллэргэ сөп түбэһиэхтээх:

а) 30 х 40 мм кээмэйдээх, сирэйэ чуолкайдык көстөр, бэргэһэтэ суох буолуохтаах;

б) хаартыскаҕа көстөр сирэйин ойуута булчут билиэтин ылаары сайабылыанньаны биэрбит киһи сааһыгар сөп түбэһиэхтээх, хараҕа чуолкайдык көстүөхтээх, баттаҕа мэһэйдиэ суохтаах;

в) хаартыскаҕа киһи сирэйин быһыыта чуолкайдык, толору хайдах баарынан көстүөхтээх;

г) куруук ачыкы кэтэр киһи хаартыскаҕа түһэригэр ачыкыта тонировкаламмыт өстүөкүлэтэ суох буолуохтаах эбэтэр мэдиссиинэ көрдөрүүтүнэн хараҕа бэрэбээскилээҕэ эрэ көҥүллэнэр;

д) пуорманы кэтэн, тас таҥастаах, сэҥийэтин сабар саарпыктаах түһүү, ону тэҥэ тас көрүҥү тупсараары ретуштатыы көҥүллэммэт;

е) итэҕэлигэр олоҕуран туора дьоҥҥо бэргэһэтэ суох көстөр табыллыбат түгэнигэр сирэйэ толору көстөр уонна төбөтүгэр бэргэһэлээх (головной убор) хаартыскатын биэриэхтээх;

ж) хаартыска фона маҥан, туох да бээтинэтэ, дьураата уонна атын биридимиэт, күлүк көстүүтэ суох буолуохтаах.

Булчут тугу илдьэ сылдьыахтааҕый?

1. Бэйэтин кытта:

— булчут билиэтин;

— булт саалаах эбэтэр пневматическай сэбиргэллээх буоллаҕына, балары илдьэ сылдьыыга көҥүллээх;

— киһи барыта бултуур сиригэр бултуурга көҥүллээх буолуохтаах;

— сыһыарыллыбыт бултуур сирдэргэ бултуур түгэнигэр олохтоммут бэрээдэгинэн бэриллибит көҥүллээх уонна путевкалаах (булт хаһаайыстыбатын эйгэтигэр өҥөнү оҥорор туһунан дуогабары бигэргэтэр докумуон) буолуохтаах.

2. Булчут булт быраабылатын тутуһуохтаах уонна бэрэбиэркэлиир боломуочуйалаах дьоҥҥо (булт хаһаайыстыбатын управлениетын судаарыстыбаннай уорганнарын үлэһиттэрин, булду кэтээн көрүүгэ судаарыстыбаннай уонна биэдэмистибэннэй үлэһиттэргэ, заповедниктар, заказниктар, ураты харыстанар сирдэр, промысловай, успуорт хаһаайыстыбаларын, полиция, ойуур уонна балык харыстабылын, уопсастыбаннай иниспиэктэрдэр уонна айылҕа харыстабылын иниспиэктэрдэрин, баҕа өттүлэринэн идэтийбит норуот дружиналарын чилиэннэрин) булт кэмигэр, бултуур сиригэр айанын кэмигэр, бултаабыт булдун тиэйэригэр, атыылыырыгар эбэтэр соҕотуопкалыыр тэрилтэҕэ туттарарыгар көрдөрүөхтээх.

3. Бэрэбиэркэ кэмигэр бултуур сэбин-сэбиргэлин уонна бултаабыт бородууксуйатын көрдөрүөхтээх.

4. Ылбыт көҥүлүгэр ыйыллыбыт бултааһын нуорматын уонна болдьоҕун тутуһан бултуохтаах.

5. Сэрэхтээх буолууну тутуһуохтаах, ордук сааҕа-сэпкэ. Саата, ботуруоннара атын киһи ылбат сиригэр хараллыахтаах.

Георгий Колесов,

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин Булт уонна булт баайын харыстааһыҥҥа департаменын кылаабынай исписэлииһэ.

БАЛАҺАНЫ БЭЛЭМНЭЭТЭ ЖЕННИ СТРЮКОВА.
ХААРТЫСКА: Г.КОЛЕСОВ ЫЫТТА УОННА HTTPS://PXHERE.COM/RU/PHOTO/169435