Ситэриилээх былаас Үөһээ Бүлүү улууһугар отчуотун иккис күнүн Хомустаах нэһилиэгэр түмүктээтэ. Хомустаах улуус кииниттэн 55 км ыраах, Дүллүкү, Кырыкый нэһилиэктэрин кытта ыаллаһа сытар.
Бүлүү өрүһүнэн Нам нэһилиэгин уонна Бүлүү улууһун сирдэринэн быысаһар. Нэһилиэнньэтин ахсаана 240-н тахса киһи, 64 хаһаайыстыбалаах. 9 кылаастаах оскуолаҕа 30-ча оҕо үөрэнэр, 20-чэ оҕо уһуйааҥҥа сылдьар.
Нэһилиэк ааспыт сылга туруорбут боппуруостара аҥаара быһаарыллыбыт. Олохтоохтор бибилэтиэкэ, оскуола, уһуйаан саҥа тутууларын, суолу-ииһи, уот энергиятын, суотабай сибээһи тупсарыыны туруорсаллар.
Биир кыһалҕаларынан от тиийбэтэ, үүт туттарыытыгар олус элбэх көҥүлү ааһыы буолар. Аны атыылаһыахтарын сыаната ыараханын эттилэр. Хомустаахтар сүрүннээн ынах сүөһүнү иитиинэн дьарыктаналлар, 200-тэн тахса нэһилиэнньэҕэ сүөһүлэрин ахсаана 500-чэкэ. Онон тыа хаһаайыстыбатыгар боппуруостара элбэх.
Аны туран, баай устуоруйалаах нэһилиэк билигин үлэлии турар тэрилтэлэрэ олох былыргы тутууларга олороллор.
Нэһилиэк сайдарыгар, кэҥииригэр уот кыамтата улахан оруоллаах дииллэр олохтоохтор:
Култуура-успуорт комплексын тутары туруорсаллар. Бырайыага оҥоһуллан бэлэм эрээри, ханнык даҕаны бырагыраамаҕа киирбэккэ сылдьар. Дьиҥэ, бу комплекс тутуллара буоллар, хас даҕаны тэрилтэ кыһалҕата быһаарыллыа этэ диэн олохтоохтор көрдөһөллөр.
Улуус киинигэр диэри оптуобус сырыыта эмиэ ахтылынна. Муниципалитеттар икки ардыларыгар айанньыттары таһыы-тиэйии бырагырааматыгар киирсэн улуус киинигэр диэри оптуобуһунан хааччыйыы, ыарыһахтары таһарга «суһал көмө» сырыыта быһаарыллар кыахтааҕа этилиннэ.
2017 с. квартальнай хочуолу тутуу өрөспүүбүлүкэтээҕи бырагыраамаҕа киирбитэ, ол гынан баран көһөрүллэн, ол бырайыак хаалан турар. Ыксал буолан, солбук курдук саҥардыллыбыт хочуоллаах нэһилиэк эргэ хочуолун аҕалан туруорбуттар. Ол кыамтата кыра. Орто Түҥтэн тардыллар гаас икки сылынан кэлэр түгэнигэр, хочуол наадата суох курдук буолуон сөп эбит. Ону тустаах биэдэмэстибэ исписэлииһэ улуус дьаһалтатыгар сүрүннүүр үлэһити кытары сүбэлэһэн, ханнык хайысха көдьүүстээҕинэн быһаарыах буолла.
Хомустаах кыра нэһилиэк, ол гынан баран, кэнники сылларга сайдар кэскиллээх, нэһилиэнньэтэ сэргэх, туруорсара элбэх.
Мунньах түмүгүнэн олохтоох былаас отчуотун астыммыттарын эттилэр.
1977 с. Дьокуускай куоракка олоҥхоҕо, фольклорга сыһыаннаах “Эпическое наследие народов Сибири и Дальнего Востока” диэн Бүтүн Сойуустааҕы научнай…
Тааттаҕа “Манчаары оонньуулара” буолара чугаһаата. Далааһыннаах тэрээһин түһүлгэтигэр дьон-сэргэ тоҕуоруһуо. Улахан эппиэтинэс сүктэриллибит улууһа онно…
Кырачаан Саргы ийэтэ өлүөҕүттэн билбитэ эрэ аҕата. Аҕыйах сыллаахха диэри эбэлээх эһээтэ бааллара. Аҕата биэс…
Дьыл-хонук аастаҕын аайы, саха литэрэтиирэтигэр сонун көстүүлэр баар буолаллара кэрэхсэбиллээх. Чопчулаан эттэххэ, биир дьиэ кэргэнтэн…
Хатыҥ ыаһа диэни истибиккит, билэҕит дуо? Хайдах оҥороллоро буолуой? Манна көрүҥ. Бу туһунан Т.Гуляева суруйуутун…
Алексей Семенов сырдык кэриэһигэр Бу күннэргэ саха дьоно уонна саха суруналыыстыката улахан сүтүктэннэ. Байыаннай дьайыыга…