Сайдыыга туһуламмыт үлэҕэ ураты толкуйдаах айар дьону сыһыарыахха

Бүгүн Дьокуускайга «Үлэ кыбаартала» креативнай кластерга «Создано на Дальнем Востоке» диэн норуоттар икки ардыларынааҕы пуорум иккис күнүн ыытыллар. Пуорум бырагыраамата киэҥ уонна дириҥ ис хоһоонноох.

«Креативнай хапытаал — айар үлэ уонна экэниэмикэ синергията» пленарнай сиэссийэҕэ РФ Уһук Илиҥҥэ уонна Арктикаҕа миниистирэ Алексей Чекунков, Ил Дархан Айсен Николаев, Бурятия Өрөспүүбүлүкэтин баһылыга Алексей Цыденов (куйаар ситиминэн), дойду биллиилээх уопсастыбаннай диэйэтэллэрэ кыттыыны ыллылар.

Ил Дархан Айсен Николаев пленарнай муннньахха биир кэрэхсэбиллээх түгэни бэлиэтээтэ: «Аан дойдуга куораттар сайдыыларын чинчийбиттэринэн, олоҕу 1% ураты толкуйдаах, креативнай дьон хамсатар эбит. Куорат баһылыга бу 1% дьону хас биирдиилэрин тус билиэхтээх уонна куораты салайыыга сыһыаран кытыннарар буоллаҕына, сайдыыны күүтүөххэ сөп», — диэн бэлиэтээтэ.