Социальнай хааччыйыы эйгэтигэр аналлаах бырайыак ситиһиилээхтик түмүктэннэ
![](https://sakha-sire.ru/wp-content/uploads/2024/07/sajt-7-1-1060x596.jpg)
Социальнай хааччыйыы эйгэтигэр аналлаах бырайыак Саха сиригэр ситиһиилээхтик түмүктэннэ. Бырайыакка 36 киһи кыттыбытыттан 12-тэ психоневрология интэринээтигэр, онтон 24 киһи дьиэ кэргэттэргэ (ол эрээри интэринээккэ киллэриллэр кутталлаахтара) олорбуттара.
Бырайыак чэрчитинэн куруук олорорго аналлаах отделение тэриллибитэ. Манна бырайыак кыттыылаахтара бэйэлэрэ, кимтэн да тутулуга суох олорорго үөрэммиттэрэ, ону таһынан үлэ мастарыскыайдарыгар үлэҕэ реабилитацияны ааһан, оробуочай идэлэргэ үөрэммиттэрэ. Бырайыак сакаасчыта -– СӨ Үлэҕэ уонна социальнай сайдыыга министиэристибэ, оператор -– «ВЭБ.РФ» сайдыы судаарыстыбаннай корпорацията, тэрийээччи (инвестор) -– «ВЭБ.ДВ» аахсыйалаах уопсастыба, толорооччу -– «ГАООРДИ» инбэлиит оҕолор төрөппүттэрин уопсастыбаннай тэрилтэлэрин Санкт-Петербургтааҕы ассоциацията.
Бырайыак 2021 сыл муус устар 1 күнүттэн 2024 сыл кулун тутар 31 күнүгэр диэри олоххо киллэриллэр.
«Саха сирэ 2019 сылтан социальнай сабыдыал бырайыактарын олоххо киллэриигэ көхтөөхтүк кыттар. Бырайыакка саҥа технологиялары үлэлэтэргэ үп кыаҕын эрэ буолбакка, эспиэрт тэрилтэтин тардыы олус суолталаах этэ. Оператор -– ВЭБ.РФ корпорация өттүттэн бырайыакка ахсаабат болҕомтото эмиэ наадалааҕа», -– диэн СӨ бырабыыталыстыбатын бэрэссэдээтэлин солбуйааччы Георгий Степанов быһаарда.
ВЭБ.РФ ыҥырбыт тутулуга суох сыана быһааччыта -– Арассыыйа Үлэҕэ министиэристибэтин Г.А.Альбрехт аатынан мэдиссиинэ-социальнай эспэртиисэ уонна реабилитация федеральнай наука-үөрэх киинин тус сыаллаах көрдөрүүлэр аһара бараннар, социальнай көдьүүстээх буолбуттарын бигэргэттэ. Ол курдук урут психоневрология интэринээтигэр олорбут 6 киһи социальнай үлэһит арыаллаах бэйэтэ олоро көстө. Психоневрология интэринээтигэр сытааччылар туспа олоро барыылара интэринээккэ биир киһини хааччыйарга өрөспүүбүлүкэ ороскуотун 5 төгүл аҕыйатыан сөп. Бырайыак олоххо киллэриллиитин эбии биир көдьүүһүнэн 27 социальнай бенефициары үлэҕэ ылыы буолла.
«Социальнай сабыдыал бырайыагын көмөтүнэн биһиги Петербурдааҕы уопуппутун социальнай тэрилтэлиин үллэстэр уонна үтүө сүрэхтээх дьон олорор Уһук Илин эрэгийиэнин кытта билсэр кыаҕы ыллыбыт. Саха сириттэн бииргэ үлэлэһээччилэрбит -– бэйэлэрин дьыалаларыгар бэриниилээх дьон. Кинилэр үс сыл устата олус улахан суолу арыйдылар, ону бырайыак хас биирдии кыттааччытын олоҕор тахсыбыт уларыйыы туоһулуур. Бу барыта Саха сирин Үлэҕэ уонна социальнай сайдыыга министиэристибэтин үтүө санаалаах, интэриэстээх бэрэстэбиитэллэрэ кыттыыта суох кыаллыа суох этэ. Биһиги манна дьиҥнээх биир санаалаахтарбытын уонна социальнай уларыйыылары киллэрээччилэри буллубут, Саха сиригэр бырайыак инникитин да сайда туруоҕар эрэнэбит», -– диэн ГАООРДИ бэрэсидьиэнэ Маргарита Алексеевна Урманчеева тоһоҕолоон бэлиэтээтэ.
2024 сыл от ыйынааҕы түмүгүнэн, РФ субъектара 12 бырайыагы олоххо киллэрэр туһунан быһаарыы ылыннылар (5 бырайыак ситиһиилээхтик түмүктэннэ).
«Билигин социальнай сабыдыал бырайыактарын боруобалааһын түмүктэрэ бырайыак ситиһиитигэр уонна туһатыгар түмүк оҥорорго көмөлөһөллөр», -– диэн ВЭБ.РФ бэрэссэдээтэлин солбуйааччы Константин Вышковскай тоһоҕолоон бэлиэтээтэ.
Сообщить об опечатке
Текст, который будет отправлен нашим редакторам: