Сайсарыга күүтүүлээх успуорт комплекса үлэҕэ киирэн эрэр

Быйыл Сайсары олохтоохторугар күүтүүлээх бэлиэ түгэн үүнээри турар. “Демография” национальнай бырайыак чэрчитинэн “Успуорт – олох нуормата” бырагырааманан “Чыпчаал” элбэх функциялаах успуорт комплекса үлэҕэ киирэн эрэр.

«Манна художественнай гимнастика спортсменнарыгар анаан 18 миэтэрэ үрдүктээх Саха сиригэр суох саала баар буолла. “Өйдөөх дьиэ” тиһигинэн ичигэс муосталаах, 400 киһи олорор түрүбүүнэлээх, вентиляцията сабыс саҥа технологиянан оҥоһуулаах. Иккис этээскэ бокс саалата, тренажернай саала бааллар. “Азия оҕолоро” оонньуулар кэмнэригэр манна кыргыттар волейболлара ыытыллыа», — диэн кэпсээтэ 9 №-дээх оҕо успуорт оскуолатын дириэктэрэ Василий Рязанскай.

Бу комплекс баазатыгар сабыс-саҥа оҕо успуорт оскуолата аһыллыа, оонньуулар кэннилэриттэн оҕолору сүүмэрдээн ылыыны саҕаланыа. Художественнай гимнастиканан, волейболунан, пауэрлифтининэн, боксанан, сахалыы остуол оонньууларынан, о.д.а. хайысхаларынан эрчиллиэхтэрэ. Сайсары уокуругар соҕотох успуорт комплексын аттыгар 5 оскуола, 2 оҕо уһуйаана баар. Киэһэтин улахан дьоҥҥо анаан тренажернай саала үлэлиэҕэ. Доруобуйалара хааччахтаах дьоҥҥо анал оборудованиенан хааччыллыбыт, пандус, лифт оҥоһуллубуттар.