Сайсарыга саҥа эбийиэк – Саха политехническэй лиссиэй эбии тутуута үлэҕэ киирдэ

Бүгүн, Билии күнүгэр, Дьокуускай куорат Саха политехническэй лиссиэйин эбии дьиэтэ тутуллан үлэҕэ киирэр үөрүүлээх тэрээһинэ буолла.

Саха политехническэй лиссиэй Дьокуускай куорат 14 №-дээх осуолатын  баазатыгар тэриллибитэ. 1978 сыллаахха тутуллубут оскуолаҕа үөрэнээччи ахсаана сыллата элбээн, үөрэхтээһин аныгы стандартыгар эппиэттииргэ  саҥа кэбиниэттэр наадаларын туһунан боппуруос турбута.

Бүгүн үөрүүлээх тэрээһиҥҥэ кыттыбыт Ил Дархан Айсен Николаев оскуола ситиһиилэрин бэлиэтээн туран, бүгүҥҥү долгутуулаах  күнүнэн эҕэрдэлээтэ уонна  манна элбэх хайысхалаах үөрэхтээһин аныгы кластера тэриллибитин бэлиэтээтэ.

Манна оҕолор оскуола паартатыттан талан ылыахтаах идэлэригэр интэриэстэрин учуоттаан, элбэх хайысхалаах үлэни ыыталлар.

“Оскуола кэлэктиибэ  аныгы ньымалары туһанан ситиһиилээхтик үлэлээбитэ ыраатта. Хас эмэ уонунан сылларга оскуола көрдөрөр түмүктэринэн киэн туттабыт. Мин лиссиэйгэ ситиһиилэри, мэлдьи үрдүк үктэлгэ сылдьалларыгар, иннигит диэки хардыылаан иһэргитигэр, Дьокуускай куоракка эрэ буолбакка, өрөспүүбүлүкэҕэ барытыгар оскуолаҕа үөрэх флагманынан буоларгытыгар баҕарабын”, — диэн эҕэрдэтин тириэртэ уонна оскуола саҥа оптуобустанарыгар сэртипикээти бэлэхтээтэ. Ону сэргэ оскуола ситиһиилээх учууталларыгар, тутааччыларга наҕараадалары туттарда.

Саха политехническэй лиссиэй дириэктэрэ Надежда Тимофеева Ил Дархан Айсен Николаевка, үөрэх миниистирэ Ньургуна Соколоваҕа, Дьокуускай куорат мэрэ Евгений Григорьевка уо.д.а. дириҥ  махталын тириэртэ.

“Биһиги оҕолорбут инники кэскиллэригэр, үлэ киһитин иитэн таһаарарга уонна өрөспүүбүлүкэбит, дойдубут экэниэмикэтигэр каадырынан кылааты киллэриигэ улахан эппиэтинэһи сүгэбит”, — диэн эттэ.

Эҕэрдэлээччилэр бу лиссиэй оҕолоро  аныгы тэриллэринэн толору хааччыллыбыт киэҥ-куоҥ, сырдык кэбиниэттэргэ  үөрэнэн, өссө киэҥ билиини ылалларыгар, өрөспүүбүлүкэлэригэр туһалаах дьон буола утаалаталларыгар  баҕардылар.

Бу үөрүүлээх түгэнинэн  лиссиэй учууталларын, биир саастыылаахтарын, ыалдьыттары Саха политехническэй лиссиэй Өрөгөй ырыатынан эҕэрдэлээтэ.

Манна даҕатан эттэххэ,  “АРКТИК КАПИТАЛ” хампаанньа бөлөҕөр киирэр “Главстрой” уопсастыбаны кытары оскуола дуогабар түһэрсибитэ. Онон Саха политехническэй лиссиэйи эбии тутуу былырыын  саҕаламмыта.

5580 квадратнай миэтэрэ иэннээх  саҥа эбийиэк 326 миэстэлээх.