Сайт нөҥүө дьону албыннаабыт киһини туттулар

ИДьМ пресс-сулууспата иһитиннэрбитинэн, дьону сайт нөҥүө тутуу матырыйаалын атыылыыр аатыран харчы суйдуур 35 саастаах Иркутскай олохтооҕун туппуттар.

Дьокуускай олохтооҕо Иркутскайтан тутуу матырыйаалын сакаастаары ыйыллыбыт биллэриинэн сибээскэ тахсыбыт. Эр киһи 180 тыһ.солкуобайы ыыппыт. Кини Иркутскай уобалаһыгар тиийэн атыыһыты кытта көрсө сатаабыт эрээри, атыыһыт сибээскэ тахсыбатах. Онуоха эмсэҕэлээбит киһи тута полицияҕа үҥсүбүт.

РФ холуобунай кодексатын 159 ыст. » Түөкүннээһин» диэн дьыаланан суһал үлэлэр ыытылланнар, суһал-ирдиир үлэ түмүгүнэн 35 саастаах эр киһини туппуттар. Уорбаланааччы тутуллан баран доппуруос кэмигэр тиэмэни гражданскай-быраап сыһыаннаһыытыгар эргитэ сатаабыт. Кини ылбыт харчытын төһөтүн эрэ төннөрбүтүн кэпсээбит. Ол эрээри, кини дьыалата холуобунай сокуон хараҕар сөп түбэһэринэн, холуобунай дьыала тэриллибит.