“Сайылык ыала” — аймаҕынан сонун күрэх буолуоҕа

Сир-дойду аайы бэс ыйыгар Үрүҥ Тунах ыһыахтар ыытыллыахтара, үтүө алгыс түстэниэ.

Ол курдук, Мэҥэ Хаҥалас улууһун 2-с Наахара нэһилиэгэр (баһылык П.Никитин) бэс ыйын 14 күнүгэр ыһыахтаары бэлэмнэнэллэр. Онон хочолор ыһыахтарыгар дьону-сэргэни тардаары араас куонкурустары торумнаабыттар.

Улахан дьон ортотугар “Уһун суһуох” күрэҕэ ыытыллыахтаах. Кыайыылаах үлэ,тыыл бэтэрээнэ, өр сылларга Наахара балыыһатыгар санитарканан үлэлээбит Никанорова Наталия Васильевна оҕолоро, сиэннэрэ туруорбут харчынан бириистэрин тутуоҕа. “Ыһыах маанылаах таҥаһа» сахалыы таҥас күрэҕэр кыайбыт киһиэхэ Аҕа дойду Улуу сэриитигэр Хотугулуу-Арҕааҥҥы фронт 523-с стрелковай полкатыгар стрелогунан сулууспалаабыт, Албан аат уордьан кавалера, Колесов Петр Гермогенович оҕолоро, сиэннэрэ, хос сиэннэрэ туруорбут харчы бирииһин тутуохтара.

Сэрии ыар сылларыгар колхуоһунан түмсэн тыылга Кыайыыны уһансыбыт саха ыалын ытыктаан, Улуу Кыайыы 80 сылынан “Сайылык ыала” диэн аймаҕынан сонун күрэх буолара күүтүллэр.  Эстэпиэтэ түһүмэхтэрин анал торумун кыттааччылары түмэн быһаарыахтара. Күрэххэ аймаҕынан кытталлара ирдэнэр. Хамаанда 5 кыттааччылаах буолуохтаах.

Кыайыылаах хамаанда Аҕа дойду Улуу сэриитигэр 1943-1944 сс. Забайкальскай байыаннай уокурукка 20-с ат депотугар сулууспалаабыт, сэрии бастакы сылларыгар “Новай” холкуоска  бэрэссэдээтэлинэн үлэлээн, үгүс дьону хоргуйууттан быыһаан, дьон махталын ылан, күн бүгүнүгэр диэри истиҥник ахтыллар, “Килбиэннээх үлэтин иһин” мэтээллээх Никаноров Исак Иванович кийиитэ Тамара Егоровна, сиэннэрэ, хос сиэннэрэ олохтообут харчынан бириэмийэлэрин тутуоҕа. Онон, олохтоохтор Ыһыах күнүн кэтэһэллэр.