Сайылыкка үрүҥ илгэ үрүлүйэ сүүрэр

Бу күннэргэ Үөһээ Бүлүү улууһун Мэйик нэһилиэгэр Арассыыйаҕа Аҕа дойдуну көмүскээччилэрин, Саха сиригэр Ийэ дойдуну көмүскээччилэр сылларыгар, улууска дойдуга бэриниилээх буолуу сылыгар уонна Улуу Кыайыы 80 сылыгар аналлаах Үрүҥ Тунах ыһыаҕа буолан ааста.

Үрүҥ Тунах ыһыах биир саамай интэриэһинэй түһүлгэтинэн Арассыыйа агропромышленнай комплексын бочуоттаах үлэһитэ, “Звезда экономики России” уордьан III истиэпэннээх кавалера, Саха Өрөспүүбүлүкэтин тыатын хаһаайыстыбатын үтүөлээх үлэһитэ, Саха Өрөспүүбүлүкэтин бааһынай хаһаайыстыбаларын уонна тыа хаһаайыстыбаларын кэпэрэтииптэрин ассоциациятын салайааччыта, Мэйик нэһилиэгин ытык киһитэ, “Кээникээн” тэрилтэни төрүттээччи Константин Егорович Тимофеев 60 сааһынан, кини сырдык аатыгар ыытыллыбыт «Үрүҥ илгэни үрүлүтээччи» күрэҕэ буолан ааспытын сырдатыахпын баҕардым. Константин Егоровиһы өрөспүүбүлүкэ үгүс олохтооҕо билэр, истибит буолуохтаах. Өр сылларга тыа хаһаайыстыбатын салааларыгар үлэлээбит киһи. Хомойуох иһин, орто сааһыгар үлэ-хамнас үөһүгэр сылдьан олохтон туораабыта иккис сылыгар барда.

Тыа хаһаайыстыбатын сылгы-ынах иитиитинэн дьарыктанар дьоҥҥо анаммыт «Үрүҥ илгэни үрүлүтээччи» күрэҕэ  үрдүк таһымҥа ааспытын бэлиэтиэхпин баҕарабын. Бу чуолаан ыанньыксыттарга туһуламмыт, бэртээхэй күрэх буолар. Тыа хаһаайыстыбатын эйгэтигэр туруулаһан үлэлии сылдьар дьоҥҥо маннык болҕомтолоох сыһыан, инникитин үлэлииллэригэр-хамсыылларыгар көҕүлүүр күүһүнэн буолуоҕа. Мантан кынаттанан, дьэ сайыны быһа дьиэрэҥкэйдии сылдьан үрүҥ илгэни үрүлүтэн, үүт туттаран, быыһыгар оту-маһы кыайа-хото тутан дьиэ кэргэн уйгулаах олоҕун тупсарыахтара турдаҕа.

Күрэҕи К.Е. Тимофеев бииргэ төрөөбүт эдьиийдэрэ М.Е. Борисова, А.Е. Тимофеева, балтылара А.Е. Слепцова, күтүөтэ А.И. Слепцов тэрийдилэр. Бириистэрин кэргэнэ, оҕолоро, аймахтара уонна бииргэ үөрэммит доҕотторо туруорбуттар

Уопсайа 11 үрүҥ илгэни дэлэтээччи кытынна. Күрэх алта түһүмэҕинэн: ынах киэргэтиитэ; ынах ыаһына; илии сэппэрээтэрин таҥыы;  саха олоҕо-дьаһаҕа (викторина); ынах быатын өрүү; арыылааһын түһүмэҕинэн ыытылынна. Олус көхтөөхтүк, өрө көтөҕүллүүлээхтик кытыннылар. Ол курдук алта түһүмэххэ барытыгар дэгиттэр А.Н. Потапов бастакы миэстэни ылан К.Е. Тимофеев бииргэ төрөөбүттэрэ, кэргэнэ, кыыһа, күтүөтэ, уола уонна Дьокуускайга, Мэйиккэ, Боотулууга, Үөһээ Бүлүүгэ, Томпоҕо, Харбалаахха, олорор аймахтара кыттыһан туруорбут автодоильнай аппараттарын тутта. Иккис миэстэни ылбыт З.Н. Николаеваҕа өр сылларга ыанньыксытынан үлэлээбит элбэх оҕо ийэтэ, үлэ, тыыл бэтэрээнэ  Мария Игнатьевна Тимофеева аатынан бирииһи морозильнай лары кыыһа Лебедева-Барахова Талаана Мандар кыыһа уонна оҕолоро туттардылар.  Үһүс миэстэлээх Е.М. Спиридоноваҕа Константин Боотулуу оскуолатыгар бииргэ үөрэммиттэр доҕотторо туруорбут бириистэрин – электрическай сэппэрээтэри уонна үүт таһарга сөптөөх улахан бөтүөнү ылан үөрдэ-көттө. Төрдүс миэстэни ылары ситиспит К.В. Иванова олохтоох бааһынай хаһаайыстыбата туруорбут дьааһыктаах арыытын тутта. Оттон бэһис миэстэни ылбыт Т.Г. Павлова үлэ бэтэрээнэ Марина Спиридоновна Тойтонова туруорбут 5 тыһ. солк. уу харчынан бирииһин тутан үөрдэ-көттө.

Итини таһынан кыттааччыларга барыларыгар чаанньык, иһит-хомуос уо.д.а. туттардылар. Түөрт бэлиэ түгэҥҥэ анаммыт Сайылык уйгу-быйаҥ ыһыаҕа өрө күүрүүлээхтик ааста, күрэхтэргэ кыттааччылар да, көрөөччүлэр да олус астыннылар.

Түмүккэ, күрэх кыттыылааҕа, бааһынай хаһаайыстыбатын салайааччыта Екатерина Спиридонова тыа үлэһит киһитин өйүүргэ, өрө тутарга бу олус үчүгэй күрэх эбит диэн санаатын үллэһиннэ: «Уйгулаах ыһыахпыт үрдүк таһымнаахтык ааста. «Үрүҥ илгэни үрүлүтээччи» күрэҕэр кыттаммын олус астынан турабын. Маннык тэрээһиннэр, күрэхтэр тыа сирэ, тыа хаһаайыстыбата сайдарыгар көҕүлүүр күүһүнэн буолаллар диэхпин баҕарабын. Мин 102 сылгылаах бааһынай хаһаайыстыбалаахпын, 7 оҕо ийэтэбин, хас да сиэн эбээтэбин. 30 төбө ынах сүөһүлээх, ол онтон 10 ынахтаах уолум Ефим Владимирович Спиридонов тэриммит хаһаайыстыбатын көрсөбүн. Инникитин даҕаны маннык күрэхтэр буолуохтарын, тыа хаһаайыстыбатынан дьарыктанар дьоҥҥо болҕомтону ууруохтарын баҕарабын. Үрүҥ аспыт үрүлүйэ, ынах сүөһүбүт төрөлүйэ, тыа сирэ сайда турдун!».