«САЙЫН!» бэстибээлгэ үүнэр көлүөнэ туохтан өрө көтөҕүлүннэ?

Быйыл “Туймаада” стадион оҕо аймах дьиҥнээх бырааһынньыгын былаһааккатынан аан бастаан буолла. Бэс ыйын 1 күнүгэр манна АЛРОСА алмааһы хостуур хампаанньа  өйөбүлүнэн Үүнэр көлүөнэ тус сыаллаах пуондата тэрийбит “САЙЫН!” бэстибээл ыытылынна. Үгэс курдук, Оҕо көмүскэлин күнүгэр сыл аайы ыытыллар киэҥ хабааннаах тэрээһиҥҥэ элбэх ыалдьыт муһунна.

Стадион  сарсыардаттан бэстибээл арыллыытын тулуйбакка күүтэр оҕолор үөрбүт-көппүт саҥаларынан туолла. Чаҕылхай баннердар, муусука уонна кыттааччылар истиҥ мичээрдэрэ, төһө да тымныы күн-дьыл турбутун иһин, дьиҥнээх бырааһынньык эйгэтин оҥордулар. Тэрээһиҥҥэ ким баҕарар босхо киирэр буолан, баҕалаахтар бары үөрэ-көтө кытыннылар.

Фиджитал футбол уонна маастар-кылаастар

Оҕолор  күн устата дьоҕуру сайыннарар уонна кэрэхсэтэр  маастар-кылаастарга, куонкурустарга уонна квестэргэ кытыннылар.

Кинилэр “Туораах ытарҕа” киэргэллэри, 3D-принтергэ сарбынньах киэргэллэри  оҥордулар уонна шопердарга уруһуйдаатылар. Ону сэргэ спортсменнар дьарыктарын таһымын  быһаарар “Медасс” аппараакка  чинчиттэрэр кыахтаннылар. Дьоҕус  күрүөлээх  бүтэй  учаастакка успуорду таптааччылар тирии мээчиккэ эдэр сүгүрүйээчилэрин оонньууларын көрөр кыахтаннылар. Манна даҕатан эттэххэ, футбол турнира  бэстибээл чэрчитинэн аан бастаан ыытылынна. Буолаары буолан, фиджитал.

Тэрийээччилэр эппиттэринэн, ол аата интерактивнай виртуальнай футбол, FIFA виртуальнай оонньуу уонна мини-футбол элэмиэннэрэ дьүөрэлэһэллэр. Оонньуу икки түһүмэҕинэн ыытыллар: бастаан хамаандалар виртуальнай көрүҥүнэн күрэхтэһэллэр, онтон дьиҥнээх оонньуур хонууга тахсан, матчы салгыыллар. Турнирга биэс хамаанда кытынна.

Ону таһынан саахымакка турнирдар уонна успуорт араас көрүҥнэригэр (ол иһигэр, буулдьанан ытыыны уонна  остуол тиэнниһин киллэрэн туран) маастар-кылаастар ыытылыннылар.

Дьоҕуру уонна креативноһы сайыннарыы

Саха Өрөспүүбүлүкэтин Муусука үрдүкү оскуолатын үөрэнээччилэрэ бэстибээл чэрчитинэн бэртээхэй кэнсиэри көрдөрдүлэр. Көрөөччүлэр муусука эгэлгэ айымньыларын толорбут эдэр мусукааннар  талааннарын сөхтүлэр. Кэнсиэр кэнниттэн  настарыанньаны көтөҕөр сынньатар-аралдьытар бырагыраамаларга кытыннылар.

Биир чаҕылхай түгэнинэн  “Туох туһунан үҥкүүлүүгүн?”  диэн ааттаах  үҥкүү сайыҥҥы батла буолла. Батлга онлайн суруйтарбыттара уонна үгүс үҥкүүһүт бэйэтин талаанын  сыанаҕа көрдөрөр кыах бэриллэрин тулуйбакка күүппүтэ.

Бэстибээлгэ күн устата ыытыллыбыт   наука салаатыгар маастар-кылаастарга уонна быыстапкаларга  кыттааччылар наука арыйыыларын эйгэтигэр киирэр уонна умсугутуулаах  головоломкалары таайар кыахтаннылар. Аҕыс саастаах Коля  Наука дьоҕус академиятын преподаватела Василий Нохсоров салалтатынан  “Биохимия растений” ыстаансыйаҕа   араас убаҕастаах куолбалары кытта астына үлэлээтэ.

— Биһиги манна  сүбүөкүлэттэн, сугунтан уонна да атын отоннортон пигменнары араарабыт. Бу биэсэстибэлэр эйгэттэн тутулуктанан, суурадаһыннара  уларыйар. Ону оҕолорго көрдөрөбүт. Бастатан туран,  бу туһалаах. Иккиһинэн, олус интэриэһинэй, — диэн преподаватель  эрэллээх.

—  Мин олус сөбүлээтим, бу физика буоллаҕа. Биһиэхэ оскуолаҕа ити биридимиэт билиҥҥитэ суох, ол гынан баран, физика биһигини хас хардыыбыт аайы тулалыырын билэбин. Уопуттары таһынан мин остуол оонньууларын сөбүлээтим. Мээчиги биэрэр аптамааты кытары киирсэргэ холоннум, онон остуол тиэнниһигэр аан бастаан оонньоотум,  — диэтэ Коля.

Научнай квест уонна өй-санаа сумота науканы уонна логическай оонньуулары сөбүлээччилэр болҕомтолорун тартылар.

«Креатив» хайысхаҕа эмиэ маастар-кылаастар тэрилиннилэр, манна кыттааччылар сибэкки броштартан саҕалаан,  саха киэргэллэригэр тиийэ араас оҥоһуктары илиилэринэн айдылар-туттулар.

“Креасфера+” сыыппара худуоһунньуктарын  куонкуруһун финалистарын үлэлэрин быыстапкатын оҕолор уонна улахан дьон бары кэрэхсээтилэр.

Сүрүн сыанаҕа кэнсиэр уонна батллар

Художественнай бырагыраамалар чэрчилэринэн  классическай үҥкүүгэ маастар-кылаастар уонна  саха балетын оскуолатыгар сүүмэрдээһини ыытыыга маастар-кылаастар  буоллулар. Кыттааччылар талааннарын көрдөрөн, чуолаан ыччат өрө көтөҕүлүннэ.

“Туох туһунан үҥкүүлүүгүн?” үҥкүү батлыгар  Bboy GROM, Бүтүн Арассыыйатааҕы уонна норуоттар икки ардыларынааҕы күрэхтэһиилэр хас да төгүллээх кыайыылаахтара Руслан Громов (Москва к.) уонна 10-тан тахса сыл ыстаастаах  педагог  Кристина Ожиганова-Kristina Yoghurt (Казань к.) бэстибээлгэ анаан-минээн кытыннылар. Руслан уонна Кристина маастар-кылаастары ыам ыйын 31 күнүгэр ыыттылар, бэс ыйын 1 күнүгэр үгүс көрөөччүлээх үҥкүү батлын  дьүүллүүр сүбэтигэр үлэлээтилэр.

Успуорка маастар-кылаастары тэрээһин хедлайнердара: эдэрдэр ортолоругар көҥүл тустууга Европа күрэхтэһиитин кыайыылааҕа Андрей Мидловец уонна көҥүл тустууга Арассыыйа успуорка маастара Игорь Матвеев тэрийдилэр.

Бэстибээл саха эстрадатын эдэр сулустара Erkhaan, Катя ЧКРШ, Seerge, Invent уонна Аман Анхаров кыттыылаах кэнсиэринэн түмүктэннэ.

Бэйэ кыаҕын көрдөрүү

Бэстибээлгэ кыттыбыт үгүс оҕо “САЙЫН!” бэстибээл кинилэргэ  элбэх кыаҕы биэрбититтэн олус үөрдүлэр.

«Мин сарбынньахтары  оҥорбуппуттан  уонна араас муусуканы истибиппиттэн үөрдүм”, — диэн 10 саастаах Алена санаатын үллэһиннэ. Кини 8 саастаах быраата Максим: “Мин эһиил өссө кэлиэхпин баҕардым”, — диэн эбэн биэрдэ.

Саха сирин Үүнэр көлүөнэ тус сыаллаах пуондатын  генеральнай дириэктэрэ Владимир Егоров “САЙЫН!” бэстибээл хас биирдии оҕо талаанын арыйарыгар уонна айар дьоҕурун  туһанарыгар кыаҕы биэрбит дьоһуннаах тэрээһин буоларын бэлиэтээтэ.

— Быйыл  «САЙЫН!» үсүһүн ыытылынна. Хамсык иннинэ пуонда тэрээһиннэри ыыппыта, ол эрээри,  маннык киэҥ хабаана суоҕа. Ол эбэтэр “САЙЫН!” бэстибээл курдук тэрээһини 2023 сылтан саҕалаабыппыт.

Бастатан туран, биһиги арыый улахан былаһааккаламмыппыт. Урут бэстибээли “Дохсун” таһыгар, онтон “Мин Арассыыйам” устуоруйа пааркатын таһыгар ыыппыт буоллахпытына, быйыл “Туймаада” стадиону таллыбыт. Онон элбэх бииргэ үлэлэһээччилэрбит кэлэллэрин уонна тэрээһин арааһын ыытары ситистибит. Ол барыта —  АЛРОСА хампаанньа өйөбүлүнэн. Кинилэр биэрбит үптэрэ биһиги оҕолорбутугар анаабыт бырааһынньыкпытын тэрийэргэ ыытылынна. Маннык үчүгэй бырааһынньык ыытыллыбытыгар хампаанньаҕа махталбытын биллэрэбит, — диэн кини бэлиэтээн эттэ.

Эдэр талааннарга усулуобуйаны тэрийии

   АЛРОСА хампаанньа үүнэр көлүөнэни өйүүргэ уонна социальнай эбийиэктэри тутууга көхтөөхтүк кыттар. Хампаанньа эрэгийиэннээҕи бүддьүөккэ дивиденнэри уонна нолуоктары төлүүрүн таһынан,  спонсордар хантараактарынан, бэйэ социальнай бырайыактарынан уонна Үүнэр көлүөнэ пуондатын баҕа өттүнэн үбү-харчыны угуунан көмөлөһөр.

Алмааһы хостуур хампаанньа Саха сирин инники кэскилигэр улахан болҕомтотун  уурар. АЛРОСА оҕолор инники олохторугар креативнай уонна тус сыалаах айаны хааччыйар  туһугар социальнай бырагыраамалары көхтөөхтүк өйүүр.

Настя МОСКВИТИНА суруйуутуттан тылбаас