Сайын эбэтин кытта отонноон, кыайыылаах буолла

Тымныы полюһунан аатырар Өймөкөөн улууһун Төрүт нэһилиэгин уһуйаана оҕону уус-уран эстетическэй хайысханан сайыннарар соруктаах үлэлиир.

Оҕо тэрилтэтэ сыл устата Ийэ айылҕаҕа анаммыт экологическай хайысхалаах бырайыагынан үлэлиир. Бу үлэ түмүгүнэн Төрүт кырачааннара «Айдарыылаах оҕо” бырайыак чэрчитинэн “Мин тулалыыр эйгэни кытта билсэбин» диэн улууска ыытыллар оскуолаҕа киириэн иннинээҕи саастаах оҕолор куонкурустарыгар  өрүү кытталлар.

Быйыл саас уһуйаан кырачааннара бэйэлэрин бырайыактарын көмүскээбиттэрэ. Арылхан Атласов “Наукаҕа хардыы” номинацияҕа кыттан, дьонун кытта планшет оҥорбутун билиһиннэрбитэ. Милана Винокурова мыыла оҥорон ийэтигэр бэлэх ууммутун кэпсээбитэ.

Барашков Витя төрөөбүт нэһилиэгин устуоруйатыгар ылан эрэрэ сөхтөрбүтэ.

Дьяконов Айар-Хаан бэйэтэ айбыт ааҕар-суоттуур бырайыага олус мындыр оҥоһуу этэ. Оттон эбэтин кытта сыл аайы отоннуур Люся Шеломова сугун туһунан олус кэрэхсэбиллээх хаартысканан иһитиннэриини оҥорон, ол сугунуттан туох аһы эбэтинээн астыылларын көрдөрөн, 1-кы миэстэни ылбыта. Төрүт уһуйаанын аатыттан өрөспүүбүлүкэтээҕи “Айдарыылаах оҕо” бырайыак “Мин тулалыыр эйгэни кытта билсэбин” куонкуруска кэтэхтэн кыттар чиэскэ тиксибитэ.

Онно оскуолаҕа киириэн иннинээҕи улуустааҕы 4 оҕо тэрилтэтиттэн 5 уонна 7 саастаах тоҕус оҕо кыттыыны ыллылар. Куонкурус түмүгүнэн 1-кы миэстэҕэ Төрүт уһуйаана, 2-с уонна 3-с миэстэлэргэ Уус Ньара “Петушок”  оҕо саадын иитиллээччилэрэ ыллылар.

“Оҕолорбут бастыҥ үлэлэрин биһиги  киэҥ араҥаҕа таһааран, араас куонкурустарга, айылҕа харыстабылын бырайыактарыгар кытыннарабыт. Бу ыытар үлэбит өрүү үтүө түмүктээх — оҕолорбут ситиһиилэринэн төрөппүттэрин уонна биһигини үөрдэллэр”, — диэн бэлиэтиир уһуйаан сэбиэдиссэйэ Уруйдаана Егорова. Кыра нэһилиэк оҕото улуус киинин уһуйааннарыттан ордон тахсыбыта, кырдьык да, бу тэрилтэ үлэтин бэртээхэй түмүгэ.

Төрүт уһуйаанын иитиллээччитэ Люся Шеломова эбэтин Ольга Николаевнаны кытта сайын тапталлаах Хоҥкуйугар тахсан отоннуур буолан, улахан туһа киһитэ.

— Олох кыра эрдэҕиттэн бэлимиэн  оҥорон көмөлөһөрүн наһаа сөбүлүүр.  6 саастаах оҕо диэтэххэ, улахан киһи курдук оҥорор.

Өссө биир сөбүлүүр дьарыга — хаартыскаҕа түһүү.

Араастаан таҥнан, туттан баран, анаан хаартыскаҕа түһэртэрэр, — диэн кэпсиир Люся эбэтэ Ольга Шеломова.

Люся төрөөбүт Төрүтүгэр үүнэр сугун туһунан сиһилии кэпсээн, бу отонтон туох ас оҥоһулларын астаан аҕалан билиһиннэрэн, кыайыылааҕынан таҕыста. Кыысчаан айылҕаҕа сылдьарын олус сөбүлүүр.

Оҕо кыра эрдэҕиттэн бэйэтин төрүт түөлбэтин сугунуттан саҕалаан, тулалыыр эйгэни билэ-көрө улааттаҕына, кини дууһатыгар  патриотическай тыын саҕыллар буоллаҕа.