“Сайын” сүлүөт айар куттаах ыччаты иккис сылын түмэр

Атырдьах ыйын 9-11 күннэригэр Горнай улууһун Солоҕон нэһилиэгэр айар, литэрэтииринэй түмсүүлэр экспедиционнай сүлүөттэрэ үлэтин саҕалаата. Бу өрөспүүбүлүкэтээҕи тэрээһин быйыл Өрт сэлиэнньэтигэр ыытыллар.

Сүлүөккэ айар куттаах дьоҥҥо хас да куонкурус, маастар-кылаастар, сэминээрдэр , литэрэтииринэй тэрээһиннэр ыытыллаллар. Ол курдук норуодунай бэйиэт Савва Тарасов 90 сылыгар хоһоон ааҕааччылар куонкурустара, норуот артыыската Раиса Захарова 70 сылыгар ырыа куонкуруһа, хоһоон суруйуу, инсценировка, видеографтар куонкурустара тиһигин быспакка ыытыллыахтара.

Олус наадалаах “Психология драмы”, “Звук. Слово. Речь” тиэмэлээх маастар-кылаастар буолуохтара.

«Сүлүөккэ хас да сэминээр үлэлиэ, биирдэстэригэр спикерынан Кэбээйи улууһуттан СӨ Ыччат бэлиитикэтин туйгуна, СӨ Гражданскай көҕүлээһин туйгуна Анисья Спиридонова буолуо. Кини манна федеральнай граннар куонкурустарыгар кыттарга бырайыагы хайдах бэлэмниири, туох ирдэбиллэр баалларын, сайаапканы хайдах толоруохха сөбүн быһааран биэриэ, сүбэлиэ, ыйытыыларга эппиэттиэ», – диэн кэпсиир “АйАрт” уопсастыбаннай тэриллии чилиэнэ Вера Прокопьева-Итэҕэл. Итиэннэ Тыайаттан Сюзанна Кондакова «Биэс кинигэ» биһирэмигэр кыттыаҕа.

Сүлүөтү сүрүннээн Солоҕон нэһилиэгин дьаһалтата, «АйАрт» тэриллии, культура управлениета тэрийэн ыыталлар. Тэрээһин генеральнай спонсорунан Александр Васильев “Байдам уус” буолар. Итиэннэ “Айар” кинигэ кыһата, “АйАрт” уопсастыбаннай тэриллии, “Дьүрүскэн”, нэһилиэк дьаһалтата, айар устуудьуйалар, биирдиилээн дьон бириис туруораллар.

Айар куттаах доҕотторбутугар ситиһиилээх, таһаарыылаах күннэри баҕарабыт. Эрчимнээх эдэр саас умнуллубат түгэннэрэ эһигини кынаттаан өссө үрдүккэ көтүттүн, саҥа доҕоттору, өрөгөй үрдэллэри, саҥа сонун арыйыылары, бэртээхэй айымньылары бэлэхтээтин. Доҕордоһуу саламата сыл ахсын элбэх түмсүүлэри, эрэллээх доҕоттору, талааннаах ыччаттары түмэ тардан, сырдыкка сирдээн истин. Айыы сырдык сыдьаайа мэлдьи арчылыы, араҥаччылыы сырыттын”.