Сайын түөкүттэр ыччаты эккирэтиһэллэр

Сайын буолла да, үгүс ыччат холкутуйар, аахайбат майгыланар, сэрэҕин сүтэрэр, сорохтор сиэссийэлэрин кыайан туттарбакка төттөрүтүн ыксыыллар, стресскэ сылдьаллар. Дьэ бу кэми түөкүттэр кэтэһэн олорон мүччү туппаттар.

Сүрүн исхиэмэлэрэ ханныктарый?

“Деканат” аатыттан төлөпүөннүүллэр итиэннэ сигэнэн киирэн, куоду эт диэн модьуйаллар (сыаллара-соруктара – Госөҥөлөргө эбэтэр мобильнай бааҥҥа киирии).

Каарта дааннайдарын уораары самокаттарга, бэлэсипиэттэргэ диэн албын QR-куодтары ыыталлар.

Эрдэттэн төлөбүрдээх “олус табыгастаах” авиабилиэттэри биэрэ, туурдарга ыыта сатыыллар.

Манна киирэн биэрдэххэ туох буоларый? Харчыгын эрэ сүтэрбэккин. Эн ааккар кирэдьиити ылыахтарын эбэтэр дроппер оҥостон атын дьон харчытын таһаарарга туһаныахтарын сөп. Оттон ол холуобунай дьыала буоларын умнумаҥ.