Салайар хампаанньа оҕо эчэйбитинэн 3,5 мөл. солк. төлүүргэ эбээһинэстэннэ

Ленскэй оройуонун борокуратуурата былырыын сайын Ленскэй куорат түөлбэтин биирдэстэригэр баар оҕо оонньуур былаһааккатыгар оҕо эчэйбит чахчытынан бэрэбиэркэни ыытта. Суут быһаарыытынан 3 мөл. солкуобай суумалаах моральнай уонна 354 тыһ. солкуобай суумалаах материальнай хоромньу толуйулунна.

Бэрэбиэркэ түмүгүнэн, аҕыс саастаах кыыс дьиэтин аттыгар баар оҕо оонньуур былаһааккатыгар сылдьыбыта быһаарыллыбыт. Судаарыстыба ирдэбилигэр эппиэттээбэт тимир хачыалга оонньуу сылдьан, сиргэ охтубут. Ол кэннэ хамсыы турар хачыал кыыс оҕону төбөтүгэр охсубут. Суутунан салайар хампаанньа өттүттэн куттал суох буолуутун ирдэбилигэр эппиэттээбэт өҥөнү оҥорбуттарын түмүгэр оҕо эчэйбит диэн быһаарыллыбыт. Онон борокуруор этиитинэн суут салайар хампаанньаттан сокуоннай сааһын ситэ илик оҕоҕо 3 мөл. солкуобай суумалаах моральнай уонна 354 тыһ. солкуобай суумалаах материальнай хоромньуну төлүүргэ уураахтаата. Суут быһаарыыта сокуоннай күүһүгэр киирэ илик, онон апелляция бэриллиэн сөп диэн СӨ Борокуратуурата иһитиннэрэр.