Салгын сыттыктаах суудунанан айан төлөбүрэ уларыйда

Өлүөнэ өрүскэ гидрологическай турук уустугурбутунан сибээстээн, Дьокуускай-Аллараа Бэстээх хайысханан сылдьар салгын сыттыктаах суудунанан айан төлөбүрэ бүгүҥҥүттэн, ыам ыйын 15 күнүттэн, 5000 солк. буолла. Бу туһунан «ЛенаВодСервис» хампаанньа биригэдьиирэ Борис Строев СИА-ҕа иһитиннэрбит.

Айан төлөбүрүн сыанатын үрдэтии быстах кэмнээх буолар, навигационнай балаһыанньа бигэтийиэр диэри туруоҕа диэн биригэдьиир бэлиэтээн эппит.

Итиэннэ Борис Строев эппитинэн, «Хивус» катердар муус хойуутук устар сирдэринэн сатаан сылдьыбыттар, онон «Тайфун» аэробаттар айанныахтара. Бу суудуналар уунан, мууһунан харгыһа суох сылдьаллар.