Саллаат аартыга
![](https://sakha-sire.ru/wp-content/uploads/2024/05/7-1060x596.jpeg)
Уус Алдан улууһугар Найахыга «Саллаат аартыга» ытык миэстэ СӨ Ил Дархан гранын өйөбүлүнэн саҥардылынна.
Бу «Балыктаах» уопсастыбаннай тэрилтэ Айталина Готовцева «Знать, чтобы помнить» бырайыагынан 2023 сыллаахха куонкуруска кыайбытын түмүгэр ситиһилиннэ. Ол курдук, Аҕа дойдуну көмүскүү барар биир дойдулаахтарбытын сэриигэ атаарбыт ытык миэстэ — искибиэр саҥардыллыыта, сэрии, үлэ фронун кыттыылаахтарын сырдык мөссүөннэрин үйэтитэр стела туруоруута, күрүөтүн уларытыы, умуллубат уот макета, паннолар оҥоһулуннулар. Найахы модельнай бибилэтиэкэтин видеопуондатыгар харалла сытар эргэ кассеталары аныгы форматка көһөрүү, бибилэтиэкэ оргтиэхиньикэтин тупсарыы уо.д.а үлэлэр ыытылыннылар. Бырайыак үлэтин чэрчитинэн кэнчээри ыччаты патриотическай тыыҥҥа иитиигэ, кыраайы үөрэтиигэ Найахы орто оскуолатыгар, «Чэчир» оҕо уһуйааныгар араас тэрээһиннэр тиһиктээхтик салҕаналлар. Бырайыак олоххо киирэригэр нэһилиэк тэрилтэлэрин үлэһиттэрэ бары көмөлөөн үлэлээтибит.
Искибиэри арыйыы үөрүүлээх тэрээһинэ өрө көтөҕүллүүлээхтик буолла. Тэрээһиҥҥэ сэрии сылларын оҕолоро, үлэ бэтэрээннэрэ, ыччаттар, оскуола үөрэнээччилэрэ, үлэ кэлэктииптэрэ көхтөөхтүк кытыннылар. Биир дойдулаахтарбыт сырдык ааттарыгар сүгүрүйэн, кэриэстээн, төбөбүтүн нөрүтэн, чуумпуран турдубут.
Бырайыак ааптара Айталина Готовцева ыытыллар үлэлэри, соруктары сырдатта. Олохтоох дьаһалта баһылыга Петр Слепцов бэтэрээннэри Кыайыы 79 сылынан эҕэрдэлээтэ, Айталина Готовцеваҕа махтал сурук туттарда. Уһуйаан иитиллээччилэрэ хоһоон аахтылар. Нэһилиэк дьокутааттарын сэбиэтин бэрэсэдээтэлэ Петр Румянцев, бэтэрээннэр сэбиэттэрин бэрэссэдээтэлэ Светлана Петрова, сэрии сылларын оҕото Вера Мухина тэрээһин кыттыылаахтарын эҕэрдэлээтилэр. Оскуола быйылгы выпускнига Арсен Константинов харда тылы эттэ, ытык кырдьаҕастарга махтанна.
Светлана Петрова, бэтэрээн учуутал,
Найахы.
Хаартыскаларга Мария Константинова түһэриитэ.
Сообщить об опечатке
Текст, который будет отправлен нашим редакторам: