Хаартыска: ааптар тиксэриитэ
Бу күннэргэ “Айар“ Национальнай кыһа кинигэтин долбууругар байыаннай дьайыы кыттыылаахтарын, онно уһулуччулаах хорсун быһыыны көрдөрөн дьоруой буолбуттары сырдатыыга эмиэ биир саҥа кинигэ эбилиннэ.
Ол курдук, элбэх кинигэ ааптара, СӨ Суруйааччыларын сойууһун чилиэнэ Иван Попов-Уһук Уйбаан Арассыыйа уонна Донецкай Норуодунай Өрөспүүбүлүкэ Дьоруойа Дмитрий Егоров-Сунтаар туһунан “Кэннинэн кэхтибэтэх саха буойуна” диэн ахтыы-сэһэнэ күн сирин көрдө.
Ааптар, суруйааччы Уһук Уйбаан Дьоруой Дмитрий Егоров аҕатын, Сунтаар улууһун уонна Арыылаах нэһилиэгин ытык олохтооҕо, муниципальнай үлэ бэтэрээнин, СӨ тыатын хаһаайыстыбатын үтүөлээх үлэһитин, Арассыыйаттан “Отец солдата» анал бэлиэнэн наҕараадаламмыт Николай Алексеевич Егоровы кытта атах тэпсэн олорон сэһэргэһиитигэр олоҕуран суруйбут айымньытын ааҕааччы сэргии ылыныаҕа, интэриэһиргээн ааҕыаҕа.
Ахтыы-сэһэҥҥэ сэрии хонуутугар хорсун быһыыны көрдөрөн, олоҕун толук уурбут, өссө уратыта диэн Арассыыйа бэрэсидьиэнэ Владимир Путин байыас өстөөхтөрү кытта киирсиитин дронунан устубуттарын көрөн, “Бу байыаһы Арассыыйа Дьоруойугар түһэриҥ “ диэн дьаһал биэрбит киһитэ Дмитрий Егоров, аҕата таптаан ааттыырынан Димон оҕо сааһа, оскуолаҕа үөрэммит кэмэ, төрөппүттэрин алаһа дьиэтигэр иитиллиитэ-такайыллыыта истиҥ, сылаас тылларынан ойууланар. Дмитрий Егоров кыргыһыы хонуутугар туох быһыыга-майгыга түбэспитэ кэпсэнэр.
“Биир дойдулааҕым, үөлээннээҕим Николай Алексеевич Егоров олоҕун аргыһыныын, үтүө мааны кэргэниниин Евдокия Дмитриевналыын чахчы Ийэ дойдутугар бэриниилээх уол оҕону ииппиттэринэн киэн тутуннум», — диир кинигэ ааптара Иван Попов-Уһук Уйбаан.
Кинигэ иккис чааһыгар Дмитрий Егоров-Сунтаар туһунан аҕатын, чугас дьонун, бииргэ үөскээбит үөлээннээхтэрин ахтыылара киирбитэ Дьоруой киһи быһыытынан мөcсүөнүн арыйыыны өссө ситэрэн-хоторон биэрэр. Хайаан да тыыннаах эргиллиэ диэн күүтэ сылдьыбыт күндү киһилэрэ сэрии хонуутугар соһуччу суох буолан, аймах билэ-дьонун аймаабытын, уола суох буолбутун балыыһаҕа сытан, киниэхэ этэртэн кистээбиттэрин үрдүнэн, истэн кэбиспит ийэ аһыытын тулуйумуна, олохтон барбытын туһунан ааҕар олус хараастыылаах, долгутуулаах.
“Сэрии хонуутугар уһулуччу хорсун быһыыны көрдөрөн, Арассыыйа уонна Донецкай Норуодунай Өрөспүүбүлүкэ Дьоруойа буолбут Сунтаар улууһун Уһун Күөлүттэн төрүттээх Дмитрий Егоров-Сунтаар аатынан саха дьоно бука бары киэн туттабыт!
Дмитрий Егоров-Сунтаар аата Арассыыйа уонна Саха Өрөспүүбүлүкэтин устуоруйаларыгар кыһыл көмүс буукубаларынан суруллуо уонна бар дьону, ыччаты Аҕа дойдуга бэриниилээх буолуу, патриотизм тыыныгар иитиигэ үйэлэргэ чаҕылхай холобурунан буолуо”, — диэн ааптар ахтыы-сэһэнин түмүгэр суруйар.
Галина ВАСИЛЬЕВА
Бу күннэргэ Саха сирин улуустарыгар Төрөөбүт тыл уонна сурук-бичик күнүгэр анаммыт тэрээһиннэр салҕаналлар. Биир олус…
Бу үөрүүлээх күҥҥэ СӨ Бырабыыталыстыбатын Бэрэссэдээтэлэ Кирилл Бычков кыттыыны ылла. Гимназия устуоруйата 1990-с сыллар саҥаларыттан,…
Бэҕэһээ, Ийэ тыл, сурук-бичик күнүгэр, Киллэм култууратын дьиэтин үлэһиттэрэ ураты эҕэрдэлэринэн дьону соһуттулар уонна үөртүлэр.…
Бүгүн Уһук Илин тоҕус эрэгийиэнин сүүмэрдэммит хамаандаларын художественнай гимнастикаҕа бастыыр иһин күрэхтэһиилэрин үһүс күнэ Саха…
Төрөөбүт тыл уонна сурук-бичик күнүнэн Таатта улууһун Дьохсоҕон нэһилиэгэр “Саргыланнын-кынаттаннын сахам тылын кэрэтэ-кэрэмэһэ!” диэн өрөспүүбүлүкэ…
Бырабыыталыстыбаҕа Бүлүү бөлөх улуустарга уоту туһаныы кээмэйин диапазоннарын (тарыыптарын) хаттаан көрбүттэр. Сунтаар уонна Ньурба улуустарыгар…