Саллаат сулуһа төрөөбүт дойдутугар Бордоҥҥо кэллэ

80 сыллааҕыта түмүктэммит Аҕа дойду сэриитин ыар илдьиттэрэ күн бүгүнүгэр диэри көстө-биллэ тураллар.  Калужскай уобалас Износковскай оройуонугар 1250 Кыһыл армия саллааттарын уонна командирдарын улахан көмүүлэригэр Саха сириттэн икки буойун кырамтата көстөн, ийэ буорга хараллыбыта.

Кинилэртэн биирдэстэрин — Сунтаар улууһун Бордоҥун киһитэ  Красков Алексей Федорович сиэн аймаҕа Николай Егоров тиийэ сылдьан, буойун наҕараадатын – гвардейскай сулуһун ыыппытын биир дойдулаахтара, Афганистан сэриитин номох буолбут лүөччүгэ Александр Петров оскуола түмэлигэр туттарда.

84 сыл устата буор анныгар сыппыт наҕараадата дьүһүнэ өлбөөрбөккө, быһыыта адьаммакка дойдутугар тиийэн-тиксэн кэлбитэ долгутуулаах уонна үөрүүлээх.

Сунтаар улууһун дьаһалтатын пресс-сулууспата