Саллааттар амарах санаалаах биир дойдулаахтарыгар махталларын ыыттылар

Саха сирин амарах, үтүө санаалаах дьоно тиһигин быспакка анал байыаннай дьайыыга сылдьар, госпиталларга сытар биир дойдулаахтарбытыгар ас-үөл, таҥас, наадалаах туттар мал хомуйан ыыта тураллар.

Соторутааҕыта волонтер Светлана уонна Владислав Диодоровтар-Лаврентьевтар дьиэ кэргэннэрэ ыҥырыы таһааран, уолаттарга анаан улуустар ас хомуйбуттарын туһунан суруйбуппут. Олус элбэх киһи, улуустар бу үтүө дьыалаҕа кытыннылар. Хомуллубут аһылыгы волонтер дьиэ кэргэн «Саха волонтердара» хамсааһын волонтердарын кытары Москва госпиталларыгар сытар уолаттарга тириэртилэр.
Бу сырыы туһунан Светлана Диодорова-Лаврентьева кэпсиир:
—Москваҕа, байыаннай госпиталларга сылдьан уолаттары көрүстүбүт. Саха сириттэн  аһы-үөлү  кэһии гынан, Ил Дархан бэлэҕин, «Саха волонтердарыттан» тыыннаах харыйа, Чурапчы оҕолорун уруһуйдарын уонна Дьокуускай куорат 39 нүөмэрдээх оскуолатын үөрэнээччилэрин суруктарын тиксэрдибит. Саллааттар олус үөрдүлэр, амарах санаалаах биир дойдулаахтарыгар махталларын уонна кэлэн иһэр Саҥа дьылынан эҕэрдэлэрин ыыталлар.