Салайааччыны бэрик ылыыга уонна икки киһи өлүүтүгэр буруйдууллар

Өрөспүүбүлүкэ борокуруора Сергей Дябкин СӨ Бэтэринээрийэ департаменын урукку салайааччытыгар тэриллибит холуобунай дьыаланан буруйдуур түмүгү бигэргэттэ.

Салайааччы РФ Холуобунай кодексатын 290-с ыстатыйатын 2-с чааһынан уонна 5-с чааһын «в» пуунунан (бөдөҥ кээмэйдээх бэриги ылыы), ону таһынан 293-с ыстатыйатын 3-с чааһынан (гражданнар, уопсастыба уонна судаарыстыба сокуонунан харыстанар интэриэстэрин кэһиигэ, ону тэҥэ сэрэҕэ суохтан икки киһи өлүүтүгэр тиэрдии) буруйданар.

Силиэстийэ барылынан, бэтэринээрийэ департаменын салайааччыта 2022-2024 сылларга  тэрилтэ дириэктэриттэн уонна солбуйааччытыттан сулууспаларыгар көмөлөһөрүн, араҥаччылыырын, ону таһынан  3,5 мөл. солк. суумалаах бириэмийэҕэ анаабытын иһин, харчынан уопсайа 400 тыһ. солкуобайтан тахса суумалаах бэриги ылбыт. Маны таһынан, буруйданааччы 2020-2024 сылларга сулууспатыгар ээл-дээл сыһыанын түмүгэр департамент үлэтигэр элбэх кэһиини таһаарбыт. Ол түмүгэр, бэйдиэ сылдьар ыт ахсаана элбээһинэ, ону тэҥэ дьоҥҥо саба түһүү түбэлтэтэ элбээбит (455 түгэн), доруобуйаларыгар эчэйии оҥоһуллубут, ол иһигэр икки киһи өлбүт.

Буруйданааччы этиллибит буруйдары оҥорбутун билиммэт. Гражданскай ирдэбили уонна баайы-дуолу былдьыыны хааччыйар сыалтан, силиэстийэ буруйданааччы 12 мөл. солкуобайтан тахса суумалаах баайын-дуолун арестаата. Буруйдуур түмүк бигэргэтиллибит холуобунай дьыалата суукка ыытылынна. Сокуону кэһиини РФ Федеральнай куттал суох буолуутун сулууспатын Саха сиринээҕи управлениета уонна Ис дьыалатын министиэристибэтин  экэниэмикэҕэ куттал суох буолуутун уонна хоруупсуйаны утары охсуһар управлениета булан таһаарбыттар. Холуобунай дьыаланы РФ Силиэстийэлиир кэмитиэтин Саха сиринээҕи управлениета ураты суолталаах дьыалалары силиэстийэлиир бастакы отделыгар силиэстийэлээтилэр, диэн СӨ Борокуратууратын пресс-сулууспата иһитиннэрэр.