«Самныбат саргылаах саха офицера Александр Семенов»

Бэҕэһээ, алтынньы 3 күнүгэр, СӨ Национальнай библиотекатын историческай саалатыгар  байыаннай дьайыыга олоҕун толук уурбут Александр Семенов туһунан «Самныбат саргылаах саха офицера Александр Семенов» диэн кинигэ сүрэхтэниитэ, ахтыы киэһэтэ буолла.

Александр Алексеевич 1989 сыллаахха Нам улууһун  Искра нэһилиэгэр күн сирин көрбүтэ. Искраҕа оскуола боруогун атыллаабыта уонна Партизан орто оскуолатын ситиһиилээхтик үөрэнэн бүтэрбитэ. Үөрэҕин бүтэрэн, Новосибирскай куоракка байыаннай институкка туттарсан киирбитэ. Аармыйаҕа ыҥырыллан, ытык иэһин толорон баран, олоҕун байыаннай сулууспаҕа анаабыта. Александр олоҕун аргыһынаан Галина Яковлевналыын уол уонна кыыс оҕолоохтор.

Ахтыы киэһэтигэр Александр Семенов дьиэ кэргэнэ, ийэтэ, аймахтара, Намтан биир дойдулаахтара, бииргэ үөрэммит доҕотторо, сулууспалаабыт табаарыстара кыттыыны ыллылар. Александр Семенов «Парус» туһунан кинигэҕэ аймахтарын, доҕотторун ахтыылара киирдэ, ону сэргэ бэйэтэ суруйбут суруктара, хоһоонноро бэчээттэннилэр. Кинигэ 50 тираһынан Ю.А. Гагарин аатынан типографияҕа бэчээттэнэн таҕыста. Кэргэнэ Галина Яковлевна хомуйда.

Намтан ийэтэ Ульяна Дмитриевна, ийэ кынна Лена Бочкарева-Жиркова, улуус баһылыга Юрий Слепцов, бастакы учуутала, Искраҕа үөрэппит  учуутала, Партизаҥҥа үөрэппит кылааһын салайааччыта, Партизан оскуолатын директора Надежда Аммосова, Партизан нэһилиэгин баһылыга Алексей Зырянов, Көбөкөн нэһилиэгин баһылыга Гаврил Гоголев, Искра нэһилиэгин баһылыга Андрей Новгородов, улуустааҕы кииннэммит библиотечнай ситим директора, Аҕа дойду буойуннарын дьиэ кэргэттэрин Намнааҕы комитетын салайааччыта Майя Софронова, улуустааҕы «Воин» түмсүү чилиэнэ Владислав Васильев, Саха сирин саллааттарын ийэлэрин түмсүүтүн салайааччыта Мария Емельянова, Ростовтааҕы биир кэлим координциялыыр киинин салайааччыта Вера Душкевич, бииргэ үөрэммит доҕотторо Александр Семенов туһунан истиҥ-иһирэх ахтыы оҥордулар.

Тыл этээччилэр Александр хайдах курдук оҕо эрдэҕиттэн үлэһитин, туохха барытыгар эппиэтинэстээхтик сыһыаннаһарын, доҕор быһыытынан эрэллээҕин, кэргэн, аҕа быһыытынан олус элэккэйин, дьоҥҥо үтүөнү эрэ баҕарар этэ диэн бэлиэтээтилэр. Дойдутугар бэриниилээҕин үлэтинэн-хамнаһынан, олорбут олоҕунан толору дакаастыыр. Анал байыаннай дьайыыга да сылдьан взвод хамандыырын быһыытынан хорсун санаалааҕын, туохтан да чаҕыйбатын туһунан байыаннай табаарыһа, бииргэ сулууспалаабыт доҕоро Сергей Филиппов ахтан-санаан ылла.

Саха офицера Александр Семенов олоҕо, хорсун быһыыта барыбытыгар үтүө холобур буолар. Ситэ олорботох олоҕун кэргэнэ, оҕолоро, чугас аймахтара салҕыахтара.

https://t.me/namskiyulus