Самосвал уонна  «Субару Форестер» массыыналар умайдылар

Бүгүн, сэтинньи 29 күнүгэр, сарсыарда  11:19  ч. баһаарынай-быыһыыр сулууспаҕа  Ленскэйтэн  Мииринэйдиир суолга   самосвал умайбытын туһунан суһал иһитиннэрии киирбит.

ЫБММ Саха сиринээҕи управлениетын пресс-сулууспата суруйарынан,  суһал иһитиннэрии киирээтин кытта, Ленскэйдээҕи баһаарынай-быыһыыр этэрээт үлэһиттэрэ ыйыллыбыт миэстэҕэ айаннаабыттар.

Массыына мотуора,  кабина уонна иннинээҕи икки көлүөһэтэ умайбыт. Барыллааһын быһыытынан  электропроводкаҕа самыкаанньа тахсан, массыына умайбыт.

Эмиэ бүгүн,  Дьокуускай аттынааҕы Марха түөлбэҕэ,  «Субару Форестер» массыына уонна  портативнай гараас умайбыт. Билигин баһаар тахсыбыт төрүөтүн быһаараллар.