Саҥа анааһыннар

СӨ Ил Дархана Айсен Николаев саҥа анааһыннар тустарынан Ыйаахтарга илии баттаата.

Антонова Аида Константиновна Саха Өрөспүүбүлүкэтин Ыччат дьыалаларыгар уонна социальнай коммуникацияларга миниистири бастакы солбуйааччынан ананна.

Аида Антонова үрдүк үөрэхтээх. М.К. Аммосов аатынан Дьокуускайдааҕы судаарыстыбаннай университеты уонна РФ Бэрэсидьиэнин иһинэн Норуот хаһаайыстыбатын уонна судаарыстыбаннай сулууспа Арассыыйатааҕы академиятын бүтэрбит. Үлэтин Саха Өрөспүүбүлүкэтигэр Федеральнай казначейство управлениетын операционнай отделын казначейынан саҕалаабыта. Доруобуйа харыстабылын, бырамыысыланнас уонна геология, тас сибээстэр уонна норуоттар дьыалаларын министиэристибэлэригэр араас дуоһунастарга үлэлээбитэ. 2019 сыл ыам ыйыттан 2024 сыл от ыйыгар диэри «Якутия» кэҥгириэс-киин салайааччытын солбуйааччытынан үлэлээбитэ. 2024 сыл от ыйын 24 күнүгэр Саха Өрөспүүбүлүкэтин Физическэй култуураҕа уонна успуорка миниистири солбуйааччынан анаммыта.

Оттон Потапов Николай Анатольевич Саха Өрөспүүбүлүкэтин Инновацияҕа, цифровой сайдыыга уонна инфокоммуникационнай технологияларга миниистири солбуйааччынан бигэргэннэ.

Николай Потапов үрдүк үөрэхтээх. М.К. Аммосов аатынан Хотугулуу-Илиҥҥи федеральнай университеты бүтэрбит. Үлэтин 1 №-дээх Өрөспүүбүлүкэтээҕи балыыһа – Национальнай мэдиссиинэ киинин харах ыарыыларын салаатыгар саҕалаабыт. «ФОКС» УСУ (ООО) «Устудьуоннары уонна ыччаты социальнай өйөөһүн», «Автономнай технологиялар» УСУ «Кыра инновационнай тэрилтэ» генеральнай дириэктэринэн, М.К. Аммосов аатынан Хотугулуу-Илиҥҥи федеральнай университет Арктическай инновационнай киинин дириэктэринэн, Арктическай судаарыстыбаннай агротехнологическай университет цифровизацияҕа проректорынан үлэлээбитэ.

2022 сыл балаҕан ыйыгар РФ Сэбилэниилээх күүстэригэр мобилизацияламмыта, икки төгүллээх Арассыыйа Дьоруойа генерал-майор М.Е. Гудков аатынан 155-с туспа гвардейскай Курскай Жуков уонна Суворов уордьаннардаах байҕал пехотатын биригээдэтигэр сулууспалаабыта. Байыаннай дьайыы зонатыгар сулууспатын иһин уордьанынан наҕараадаламмыта. 2025 сыл балаҕан ыйыттан билиҥҥи кэмҥэ диэри П.И. Дудкин аатынан Дьокуускайдааҕы сибээс уонна информационнай технологиялар кэллиэһин преподавателинэн үлэлээбитэ.

Черноградскай Михаил Павлович Саха Өрөспүүбүлүкэтин Инновацияҕа, цифровой сайдыыга уонна инфокоммуникационнай технологияларга миниистири солбуйааччынан ананна, диэн СӨ Ил Дарханын МАХ сыһыарыы ханаалыгар иһитиннэрилиннэ.

Михаил Черноградскай үрдүк үөрэхтээх. М.К. Аммосов аатынан Хотугулуу-Илиҥҥи федеральнай университеты бүтэрбит. Бэйэтин үлэтин Саха Өрөспүүбүлүкэтин Тэлэбиидэнньэҕэ уонна араадьыйаҕа тиэхиньиичэскэй киинигэр саҕалаабыта. 2012 сылтан 2020 сылга диэри ТЦТР-га электромонтерунан, тэхиниичэскэй тэриллэри өрөмүөннүүр бөлөх инженерынан, оҥорон таһаарар лаборатория инженерынан, өҥөнү оҥорор сыах сүрүн инженерынан үлэлээбитэ. 2021 сыллаахха Саха Өрөспүүбүлүкэтин «Тэлэбиидэнньэ уонна араадьыйа тэхиниичэскэй киинэ» СУТ Киин сибээс мунньугун сүрүн инженерынан анаммыта, сотору буолан баран – «АрктикТелеком» АУо Киин сибээс мунньугун сүрүн инженерынан.

2023 сылтан 2025 сылга диэри «АрктикТелеком» АУо генеральнай дириэктэр солбуйааччытынан – сүрүн инженерынан үлэлээбитэ. 2025 сыл бэс ыйыттан билиҥҥи кэмҥэ диэри «АрктикТелеком» АУо сүрүн инженерынан анаммыта.

Дмитрий Семенович Васильев Саха Өрөспүүбүлүкэтин Инновацияҕа, цифровой сайдыыга уонна инфокоммуникационнай технологияларга миниистири бастакы солбуйааччынан ананна.

Үрдүк үөрэхтээх — Сибиирдээҕи судаарыстыбаннай телекоммуникациялар уонна информатика университетын бүтэрбитэ. Университеты бүтэрэн баран, Саха Өрөспүүбүлүкэтин«Ростелеком» АУо Уһук Илиннээҕи филиалыгар үлэлээбитэ. 2011 сыллаахха Саха Өрөспүүбүлүкэтин Сибээс уонна информационнай технологиялар судаарыстыбаннай кэмитиэтин сүрүн исписээлиһин дуоһунаһыгар анаммыта, кэлин – өрөспүүбүлүкэ Сибээс уонна информационнай технологиялар министиэристибэтин, Саха сирин Инновациялар, цифровой сайдыы уонна инфокоммуникационнай технологиялар министиэристибэтин сүрүн исписээлиһинэн.

2021 сылтан 2024 сылга диэри Саха Өрөспүүбүлүкэтин Инновациялар, цифровой сайдыы уонна инфокоммуникационнай технологиялар министиэристибэтин цифровой сайдыы салаатын салайааччыта этэ. 2024 сыл ыам ыйыттан билиҥҥи кэмҥэ диэри Саха сирин Инновациялар, цифровой сайдыы уонна инфокоммуникационнай технологиялар миниистири солбуйааччынан үлэлээбитэ.

Подробнее: https://www.sakha.gov.ru/news/15517