Кэккэ улуустарынан саҥа баһаарынай тиэхиньикэ түҥэтилиннэ

Бүгүн, от ыйын 12 күнүгэр, Саха сирин бастакы вице-премьерэ Дмитрий Садовников Үөһээ Бүлүү, Таатта, Сунтаар улуустарын баһаарынай сулууспаларыгар саҥа тиэхиньикэ күлүүстэрин туттарда.

«Бүгүн биһиги СӨ Баһаартан сэрэхтээх буолуу сулууспатын өйүүр сыалтан атыылаһыллыбыт  уочараттаах саҥа тиэхиньикэ баартыйатын туттарабыт. Биллэн турар, бу тиэхиньикэ ыксаллаах быһыыга-майгыга суһаллык көмө буоларыгар, дьон куттала суох буолуутугар мэлдьи харабылга туралларыгар баҕарабын», – диэтэ Дмитрий Садовников.

Саха сирин бастакы вице-премьерэ Дмитрий Садовников бүгүн Саха сирин улуустарынан элбэх кыбартыыралаах дьиэлэр тутуллара барарынан сибээстээн, нэһилиэнньэҕэ баһаартан куттала суох буолуутун хааччыйыыга саҥа аныгы тиэхиньикэ олус наадалааҕын бэлиэтээтэ.

«КАМАЗ баазатыгар уопсайа 90 мөл. солк. суумаҕа 3 массыына цистерната Үөһээ Бүлүү, Сунтаар уонна Таатта улуустарын сулууспаларыгар бэрилиннэ. Кэнники 3 сылга бүддьүөт уонна лизинг үбүн суотугар 572 мөл. солк. тахса суумаҕа  65 тиэхиньикэ  атыылаһыллыбыта. Бу бырагыраама хайаан да салҕаныаҕа. Саҥа тиэхиньикэ уһуннук үлэлээтин!» ,- диэн  Айсен Николаев бэйэтин ТГ-ханаалыгар суруйда.

Маны тэҥэ баһаарынайдары СӨ Гражданскай оборуона уонна нэһилиэнньэ олоҕор-дьаһаҕар куттал суох буолуутун хааччыйыыга миниистирэ Дмитрий Лепчиков уонна СӨ ЫБМ кылаабынай управлениетын начаалынньыгын солбуйааччы Григорий Колданов эҕэрдэлээтилэр.

СӨ Баһаартан сэрэхтээх буолуу судаарыстыбаннай сулууспатын ситэтэ суох бөлөҕүн хааччыйарга УАЗ-фермер баазатыгар дьоҕус массыына 21 көрүҥэ атыылаһылынна. Тиэхиньикэ муниципальнай улуустарынан нэһилиэнньэтин, нэһилиэгин ахсаанынан, ону таһынан суолун-ииһин туругуттан көрөн учуоттанан түҥэтилиннэ.

Билигин Саха сиригэр 153 подразделение үлэлиир, онтон 47 баһаарынай уонна 106 аҕыйах ахсааннаах үлэһиттээх баһаарынай чаастардаах. Бу сулууспалар 232 нэһилиэнньэлээх пуун уоттан сэрэхтээх буолууну хааччыйаллар. Күн аайы сууккаҕа дьуһуурустуба кэмигэр 490 киһи чааһынай састааптаах хамаанда уонна 311 баһаарынай тиэхиньикэ тахсар. Билигин баһаартан сэрэхтээх буолуу сулууспата ханнык баҕарар уустуктары утары охсуһарга уонна быыһыыр үлэни ыытарга бэлэм күүстээх салааны көрдөрөр. Саха сиригэр сулууспалар тиэхиниичэскэй хааччыллыылара үрдүүр, ону кытта саҥа аныгы депо дьиэлэрэ тутуллаллар.