Саҥа билсибит дьахтарын өлөрбүт

Дьокуускай куоракка саҥа билсибит дьахтарын өлөрүүгэ уорбаланар эр киһи тутулунна. Бу туһунан Силиэстийэлиир кэмитиэт иһитиннэрдэ.

СК Дьокуускайдааҕы салаатын Силиэстийэлиир отдела урут хаста даҕаны сууттана сылдьыбыт 32 саастаах Дьокуускай олохтооҕор  Холуобунай кодекс 105 ыст.  1 чааһынан холуобунай дьыала тэрийдэ.

Ол курдук, алтынньы 13 күнүгэр,  Воинскай уулусса биир дьиэтин олохтоохторо ыаллыы олорор кыбартыыраларын аана аһаҕас турарын көрөн полиция сотрудниктарын ыҥырбыттар.  Полицейскайдар тута кэлэн,  кыбартыыраҕа    моонньугар быһаҕынан анньыллыбыт дьахтар өлүгүн булбуттар. Дьиэ иһэ ыһыллан-тоҕуллан турар эбит.

Суһал-ирдиир үлэ кэмигэр полицейскайдар туһааннаах подъезка аллараа этээскэ олорор эр киһини бэрэбиэркэлээбиттэр. Онуоха эр киһи дьахтары кытта уулуссаҕа билсибитин туһунан  кэпсээбит. Дьахтар эр киһини дьиэтигэр ыҥырбыт уонна иккиэн арыгы испиттэр. Ол кэмҥэ уорбаланааччы дьахтарга эмискэ туохтан эрэ өстүйэн, хаста даҕаны быһаҕынан анньыбыт. Дьахтар ыар эчэйиини ылан тута өлбүт.

Билигин холуобунай дьыаланан силиэстийэ ыытыллар.