Саҥа билсибит киһитин каартатын уоран туһаммыт

Биир эр киһи баанын счетуттан 29 тыһыынча сүппүтүн туһунан Дьокуускай куорат 4 №-дээх полициятын отделын дьуһуурунай чааһыгар үҥсүү түһэрбит.

Холуобунай көрдөөһүн үлэһиттэрэ суһал тэрээһиннэр кэмнэригэр Горнай улууһун 36 саастаах олохтооҕун буллулар.
Кинилэр быһаарбыттарынан, икки эр киһи билэр дьоннорун хампаанньаларыгар түбэһэн, испиирдээх утахтары испиттэр. Аһааһын куорат биир саунатыгар салҕаммыт. Онтон эмсэҕэлээччи баанын каартатын саунаҕа хаалларан баран дьиэтигэр барбыт. Куһаҕан санаалаах киһи түгэнинэн туһанан, каартаны ылан маҕаһыынтан испиирдээх утахтары атыыласпыт, харчы сороҕун тус наадаларыгар туһаммыт.
РФ Холуобунай кодексатын «Уоруу» ыстатыйатынан холуобунай дьыала тэрилиннэ. Кини алта сылга диэри болдьоххо көҥүлэ быһыллыан сөп.