“Саҥа Боотур” киинэҕэ уһулуннубут”

Бэҕэһээ, от ыйын 13 күнүгэр, Хаҥалас улууһугар Орто Дойду ыһыахтыыр сиригэр “Синема” киин киинэ хампаанньатын устар бөлөҕө “Саҥа Боотур” киинэ уһуллуутугар дьону ыҥырбыта.

— Маассабай сыаналарга уопсайа 200-чэкэ киһи кытынна, — диир куорат олохтооҕо Агафья Горохова. – Биһиги дьүөгэлэр буолан, социальнай ситимҥэ ыҥырыыны көрөөт кыттарга санаммыппыт. Устар  бөлөх чилиэннэрэ бары эдэркээн оҕолор эбит. Сүрүн оруолларга АГИКИ уонна Култуура коллеһын 3 куурсун оҕолоро оонньууллар.  Киинэбит аата “Саҥа Боотур”, национальнай колориттаах фэнтези киинэ буолар диэн кэпсээбитэ режиссер Константин Данилов.

Бары сахалыы таҥастаах тиийэммит, ыһыах сыанатыгар уһулуннубут. Бэл 96 саастаах эбээ кыттан барыбытын сэргэхситтэ. Массовка режиссера Елена Анисимова барытын иилээн-саҕалаан бэркэ тэрийдэ. Киинэбит санаа хоту бардаҕына, аны кыһын тахсыах курдук. Онон кыттыгастаах дьон быһыытынан үөрэ-көтө кэтэһэбит.