Саҥа дьыл сынньалаҥнарыгар биэс монитору уорбуттар

Саҥа дьыл уһун сынньалаҥын кэмигэр буруйу оҥоруу аччаабатах. Ол курдук, Дьокуускай куорат мунньаҕар иһитиннэрбиттэринэн, сылаас тохтобуллартан биэс монитору уорбуттар.

Бу туһунан «ЯПАК»МУП  оператора иһитиннэрбит. Куорат полициятын суһал үлэтин түмүгүнэн уорууга сыһыаннаах дьон тутуллубуттар. Маны сэргэ, саҥа дьыл уһун өрөбүллэригэр сылаас тохтобулларга чуумпута суох кэм ааспыт. Ол курдук уопсайа 28 киһи административнай быраабы кэһэн тутуллубут. Олор истэригэр биир суһал көрдөөһүҥҥэ сылдьыбыт киһи тутуллубут. Арыгы атыылааһыҥҥа 10 быраабы кэһии оҥоһуллубут. 280 лиитэрэ аһыы утах былдьаныллыбыт.