Саҥа дьыл түүнүгэр итирик дьахтар доҕорун өлөрбүт

Саха сиринээҕи Силиэстийэлиир кэмитиэтин Чурапчытааҕы оройуоннар икки ардыларынааҕы силиэстийэлиир салаата РФ ХК 111-с ыстатыйатын 4-с чааһынан (киһи олоҕор кутталлаах доруобуйаҕa ыар эчэйиини соруйан оҥоруу, сэрэҕэ суохтан киһи өлүүтүгэр тиэрдии) көрүллүбүт буруйу оҥорууга буруйданар 63 саастаах дьахтарга сыһыаннаах холуобунай дьыаланы силиэстийэлиир.

Силиэстийэ сабаҕалыырынан, былырыын ахсынньы 31 күнүгэр Чурапчы улууһун Туора Күөл сэлиэнньэтигэр баар биир дьиэҕэ  итирик туруктаах дьиэлээх дьахтар уонна кини 64 саастаах доҕорун икки ардыларыгар иирсээн тахсыбыт. Иирсээн кэмигэр буруйданааччы эр киһини куухуньа быһаҕынан биирдэ анньыбыт, онтон бааһырдыбытын туһунан биэлсэргэ биллэрбит.

Быраастар ылыммыт миэрэлэрин үрдүнэн, эмсэҕэлээччи ылбыт бааһырыыттан тохсунньу 1 күнүгэр Чурапчытааҕы киин оройуон балыыһатын реанимациятын салаатыгар тыына быстыбыт. Дьахтары туппуттар. Силиэдэбэтэл көрдөһүүтүнэн буруйдааҕы хаайбыттар. Холуобунай дьыаланы силиэстийэлээһин салҕанар диэн СӨ Силиэстийэлиир кэмитиэтин пресс-сулууспата суруйар.