Саҥа дьыл үүнэр түүнүгэр сүппүт дьону буллулар

Саха сирин Быыһыыр сулууспатыгар ахсынньы 31 күнүгэр хоту улууска айаннаан иһэр дьонноох массыына сүппүтүн туһунан иһитиннэрии киирбитин туһунан СӨ Куттала суох буолууну хааччыйар судаарыстыбаннай кэмитиэтэ иһитиннэрэр.

Ахсынньы 31 күнүгэр икки «Хайс» массыына алталыы киһилээх Өлөөн улууһун Дьилиҥдэ нэһилиэгиттэн Анаабыр улууһун Сааскылааҕар айаҥҥа туруммуттар. Ахсынньы 31 күнүгэр 16.30 чааска кинилэр Дьилиҥдэни аастыбыт диэн биллэрбиттэр. Ол кэннэ дьиэлэригэр тиийбэтэхтэр, сибээскэ тахсыбатахтар. Ол күн дьонноро долгуйаннар Сааскылаахтан утары тыраахтары ыыппыттар даҕаны, булбакка төннөн кэлбит.

Улууска ыксаллаах быһыы-майгы хамыыһыйатын тэрийэннэр тохсунньу 1 күнүгэр олохтоохтор икки тыраахтарынан сүппүт дьону көрдүү иккиһин барбыттар. Ол түүн Майаат үрэх аттыттан сүппүт дьону булбуттар, хата бары этэҥҥэ дьиэлэригэр кэлбиттэр.