Баҕа санаа хайаан да туолар!

Юрий Трутнев Саха сирин оҕотун Саҥа дьыллааҕы баҕа санаатын толордо.

Саҥа дьыллааҕы харыйаҕа оҕолор баҕа санааларын толорор аахсыйа ыытылларын бары да билэр буолуохтааххыт. Манна Саха сириттэн Ярослав Колесов электропуойас машиниһа буолуон баҕарарын туһунан санаатын суруйбут.

Хараҕынан мөлтөхтүк көрөр оҕочоон баҕа санаатын суруйбут суругун вице-премьер — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев ылбыт уонна уолчаан баҕа санаатын толорбут.

Ол курдук, бу күннэргэ уолчаан Москваҕа тиийдэ, кини ыра санаата туолла. Машинистар күннэригэр, ол эбэтэр кулун тутар 28 күнүгэр, пуойас машиниһын курдук сананан ылар дьоллоох түгэн уолчааҥҥа тосхойдо. Арассыыйа биир улахан вокзалыгар — Белорусскай вокзалга сырытта, киниэхэ үлэ хайдах барарын кэпсээтилэр, көрдөрдүлэр. Бу улахан эппиэтинэстээх, уустук үлэ туһунан сиһилии быһаардылар. Ярослав билигин скрипкаҕа оонньуурун, иистэнэрин кэпсээтэ.

СӨ Ил Дарханын уонна Бырабыыталыстыбатын пресс-сулууспата

Хаартыска: тырааныспар департамена, Москва