Саҥа дьыллааҕы бэлэхтэри байыастарга туттарыахтара

Саҥа дьыллааҕы бэлэхтэри «Бары бииргэ Кыайыыга!» хамыыһыйа суһал ыстаабыгар байыастарга анаан бэлэмнииллэр.  Үгэс буолбут аахсыйа Донбасска көмөлөһөр хотугулуу-илиҥҥи пуонда өйөбүлүнэн тэрилиннэ.

—Маннык баһыылкалары биһиги Саҥа дьылга эрэ буолбакка, атын да бырааһынньыктарга ыытабыт. Хас биирдии байыас дьиэтиттэн-уотуттан, дьонуттан-сэргэтиттэн болҕомто уурулларын, кинилэр эргиллэн кэлэллэрин алаһа дьиэлэригэр күүтэллэрин билэллэрэ олус наада. Ол биһиэхэ бука барыбытыгар наада, — диэн бэлиэтиир Ил Дархан Айсен Николаев.

Саҥа дьыллааҕы бэлэххэ олохтоох бэйэ оҥорон таһаарар аһын-үөлүн угаллар. Манна балыктан, эттэн ас-үөл, отон сироба, саахардаах дьэдьэн бааллар.

Бырааһынньыктааҕы бэлэхтэр бастакы уочарат Москваҕа, Санкт-Петербурга, Улан-Удэҕэ, Приморскай, Хабаровскай кыраайдарга госпиталларга ыытыллыахтара, салгыы байыаннай дьайыы буола турар сиригэр-уотугар тиэрдиллиэхтэрэ.

—Ахсынньы 15 күнүттэн уоппускаларыгар кэлэ сылдьар байыаннай сулууспалаахтар бэлэмнэниллибит бэлэхтэри Дьокуускайга маннык аадырыстан кэлэн ылыахтарын сөп: Дьокуускай, Аммосов уул. 18, 2/4 хос. Докумуоннарын илдьэ кэлэллэрэ ирдэнэр, — диэн этэр «Бары бииргэ Кыайыыга!» хамыыһыйа суһал ыстаабын Биир кэлим сүрүннүүр киинин бэрэстэбиитэлэ Анна Меркурьева. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Сиһилии: https://www.sakha.gov.ru/news/16662

Саргын Скрябин хаартыскаҕа түһэриитэ, ЯСИА