«Саҥа дьыллааҕы таптал остуоруйата» балет кырачаан сулустара

Ахсынньы 22 күнүгэр алыптаах Саҥа дьыл бырааһынньыгын көрсө, А.Е.Кулаковскай аатынан Норуоттар доҕордоһууларын дьиэтигэр «Саҥа дьыллааҕы таптал остуоруйата» балет премьерата улахан сэҥээриини ылла.

Бу күүтүүлээх премьераны «Позиция» классическай үҥкүү устуудьуйатын эдэр үҥкүүһүттэрэ сүрдээх тэрээһиннээхтик көрдөрдүлэр. Балет оҕо аймахха биллэр Э.Т.А.Гофман «Щелкунчик уонна кутуйахтар хоруоллара» остуоруйатыгар олоҕурбут уонна улуу композитор П.И.Чайковскай үйэлээх музыкатынан доҕуһуолламмыт буолан дьон-сэргэ кутун тутта. Көрөөччүлэр үтүө санаалаах Машеньканы, хорсун-хоодуот Щелкунчигы,  муударай Дроссельмейеры уонна кини аптаах куукулаларын үөрэ-көтө көрүстүлэр. Дьоруойдар кутуйахтар хоруолларын, кини халыҥ хаххатын аарымыйатын кытта хорсуннук сэриилэстилэр.

Бу чаҕылхай туруоруу уус-уран салайааччыларынан СӨ үтүөлээх артыыһа Сергей Викторович Афонасевич уонна «Позиция» классическай үҥкүү устуудьуйатын салайааччыта Туйаара Александровна Винокурова буолаллар. Балет кыттааччылара сүрүннээн 23-с нүөмэрдээх орто оскуола оҕолоро. Үгүстэр бу улахан сценаҕа бастакы холонуулара. Хас биирдии оҕо оруолун сүрдээх боччумуран, кыһаллан, үөрэ-көтө оонньоото. Кырачаан үҥкүүһүттэр нарын-намчы эрчимнэрэ мустубут оҕолору эрэ буолбакка, улахан дьону эмиэ сөхтөрдө.

«Позиция»  устуудьуйа 2021 сыллаахха 23 нүөмэрдээх орто оскуолаҕа тэриллибит ураты бырайыак. Бу бырайыакка, анал үҥкүү үөрэҕэ суох, үҥкүүнү сэҥээрэр сөбүлээн дьарыктанар оҕолор балет үрдүк искусствотын билэр-өйдүүр кыаҕы ылаллар. Классическай үҥкүү устуудьуйатын эдэр үҥкүүһүттэрэ Москваҕа, Владивостокка, Благовещенскайга, Дьокуускайга ыытыллыбыт аан дойдутааҕы уонна өрөспүүбүлүкэ таһымнаах күрэхтэһиилэргэ бириистэри, элбэх Гран-при бириэмийэлэрин ылбыттара. Кытайга ыытыллыбыт бэстибээлгэ кыттыбыттара. Инникитин да үгүс тэрээһиннэргэ кыттыахтара, силистээх ситиһиилэринэн үөрдүөхтэрэ турдаҕа.

«Саҥа дьыллааҕы таптал остуоруйата» балет салайааччылара, тэрийээччилэрэ В.И.Малышкин аатынан 23 нүөмэрдээх орто оскуола дириэктэригэр Афонскай Георгий Афанасьевичка, иитэр-үөрэтэр үлэҕэ дириэктэри солбуйааччы Заборовская Руслана Иннокентьевнаҕа, маны сэргэ А.Е.Кулаковскай аатынан Норуоттар доҕордоһууларын дьиэтин үлэһиттэригэр күүс-көмө, өйөбүл-тирэх буолбуттарыгар истиҥник махтаналлар.

«Позиция» классическай үҥкүү устуудьуйатын «Саҥа дьыллааҕы таптал остуоруйата» туруоруута Дьокуускай куоракка ураты бэлэҕинэн буолла. Классическай музыка, үҥкүү кэрэ эйгэтэ уонна оҕо саас дьиктигэ эрэнэр умсугуйуулара холбоһон-силбэһэн чаҕылхай үөрүүнү бэлэхтээтилэр.

Антонина Пинигина.