Саҥа дьылы көрсө түннүккэ георгин сибэккилээтэ

Ахсынньы тымныытын аахсыбакка, Саҥа дьылы көрсө Үөһээ Бүлүүгэ георгин сибэкки тыллан хараҕы үөрдэр, сайыны чугаһатар.

Үөһээ Бүлүү олохтооҕо Людмила Алексеева дьарыга, интэриэһэ элбэх. Онтон биирдэстэринэн оҕуруот, сибэкки олордуута буолар. Аҕыйах хонуктааҕыта хаартыска бөлөҕөр: “Георгиным сибэккилээтэ” – диэн кылгас суруктаах, туунал маҥан кыһын ортото болҕомтону ала-чуо тардар кып-кыһыл георгин сибэккитин хаартыскатын ыыппытын “георгин сайыҥҥы сибэкки эбээт” диэн сэҥээрэн, төлөпүөнүнэн кэпсэтэ сырыттым.

— Бэйэм оҕуруот аһын, сибэкки арааһын олордобун. Дьиҥэр, георгины уруккуттан сөбүлээн олордобун. Кыһынын бөлчөҕүн ылан хаһаанабын. Былырыын биир сүбэни истэн, кинилэр эппиттэрин курдук бөлчөҕүн буорга уган, анал холодильникка укпутум. Соторутааҕыта холодильникпын арыйан көрбүтүм, георгиннарым тыллан номнуо уонча сантиметр буолан эрэллэр эбит. Сыыһа туттубуппуттан алҕаспын көннөрөөрү түннүккэ ууран баран уу кута сылдьыбытым. Биир күн кэлэн-баран иллэҥэ суох сылдьан сибэккилээх түннүкпүн арыйбатаҕым. Сарсыныгар сарсыарда арыйа баттаан баран туох кыһыл өрбөҕө сытарый дии санаатым ээ. Онтон өйдөөн көрбүтүм сибэккилээбит эбит. Биир сибэккилээх, өссө хас даҕаны арылла илик баар.

Кыһыннары роза сибэккилээччи, бу сырыыга розам суох, ол оннугар георгиным сибэккилээтэ” – диэн кэпсиир.

Людмила Васильевна тэлгэһэтигэр араас маһы олордор. Сыалаах мас атыылаһан, Өймөкөөнтөн болбукта аҕалан олордубут. Малината хойуутук үүнэн барыанньалаан хаһаанар. Быйыл яблоня, сакура курдук сэдэх мастары эмиэ эспэримиэннээн көрөөрү таһырдьа кыстата хаалларбыт.

Аны былырыын Саҥа дьылы көрсө харчылаах мас сибэккитин харыйа курдук уратытык симээбит. Быйыл эмиэ киэргэтээри ох курдук оҥосто, киэргэллэрин чөкөтө сылдьар.

Саха сирин тоһуттар тымныытын аахсыбакка, ийэлэр, эбэлэр барахсаттар ити курдук хайдах табылларынан, кыалларынан сайыны чугаһаталлар, хараҕы үөрдэллэр, сүргэни көтөҕөллөр.