«Саҥа дьылынан, бэтэрээн» аахсыйа саҕаланна

Саха сиригэр «Саҥа дьылынан, бэтэрээн!» диэн аахсыйа саҕаланна. «Биир ньыгыл Арассыыйа» баартыйа уонна «Кыайыы волонтердара» хамсааһын дойду үрдүнэн бэтэрээннэри эҕэрдэлииллэр. 

«Биир ньыгыл Арассыыйа» баартыйа эрэгийиэннээҕи салаатын сэкиритээрин солбуйааччы Иван Луцкан Саха сиригэр бу аахсыйаҕа ааны аста уонна Аҕа дойду сэриитин бэтэрээнэ Алексей Березкиҥҥэ бэлэҕин илдьэн биэрдэ.

Алексей Николаевич Березкин 100 саастаах, Дьокуускайга олорор. Аҕа дойду Улуу  сэриитин 2-с истиэпэннээх уордьанынан, «Германияны кыайыы иһин», «Японияны кыайыы иһин», «1941-1945 сс. Аҕа дойду сэриитин кэмигэр килбиэннээх үлэтин иһин» мэтээллэринэн, Үрдүкү главнокомандующай И.В. Сталин Махтал суругунан наҕараадаламмыта.

Кини 44 сылы быһа спордунан — сүүрүүнэн, хайыһарынан утумнаахтык дьарыктаммыта, кэккэ ситиһиилэммитэ, Саха сиригэр физкультурнай хамсааһын саастыылааҕа, спорт бэтэрээнэ буолар. Ол да иһин уһун үйэлэннэҕэ.

Билигин Дьокуускай куоракка 7 сэрии бэтэрээнэ олорор. Улуу Кыайыы 80 сылыгар сэрии, тыыл бэтэрээннэригэр, сэрии огдооболоругар, Ленинград блокадатын кыттыылаахтарыгар, концлааҕыр хаайыылаахтарыгар уһулуччу болҕомто ууруллуохтаах.  Аан дойдуну фашизмтан быыһаабыт көлүөнэ, 100 саастарын туолбут ытык дьоммут Кыайыы 80 сыллаах үбүлүөйүн дьоһуннук көрсүөхтээхтэр.