Саҥа хотоҥҥо киирдибит

Бүлүү улууһун I Күүлэт нэһилиэгэр баар «I Күүлэт» кэпэрэтиибэ кыстыкка хайдах киирбитин туһунан манна ааҕыҥ.

«I Күүлэт» кэпэрэтиибэ быйыл 1100 туоннаны оттуохтаах этибит. Ону сайыммыт, күһүммүт ардахтаах буолан, 816 туоннаны оттоон, кыстыкка үктэннибит. Сайыҥҥы-күһүҥҥү быыстала суох ардахтар от хаачыстыбатыгар эмиэ оҕустулар. Ол курдук, оппут 80 %-на мөлтөх хаачыстыбалаах. Быйылгы кыстыкка  саҥа хаһаайыстыба суотугар субай хотонун туттан киирдибит. Манна 200-тэн тахса субан сүөһү турар. Быйыл атырдьах ыйын бүтүүтэ Ил Дархан Айсен Николаев  Бүлүүгэ ыксаллаах балаһыанньанан сибээстээн кэлэн, миэстэтигэр  көрсөн-билсэн барбыта. Ол түмүгэр быйыл 50 % чэпчэтиилээх концентрированнай эбии аһылык кэлиэхтээх. Итиэннэ чэбдигирдии бырагырааматынан бэриллиэхтээх харчыбытын кэккэ биричиинэлэринэн ылбакка олоробут. Кириисис диэн 30 %-на эрэ бэриллэр диэбиттэрэ, онтон  Ил Дархан Айсен Николаевка кыһалҕабытын күүскэ туруорсан, дьокутааттар күһүҥҥү көрүүлэригэр ылыннаран, хойутуу да соҕус буоллар,  толору тиэрдиллиэ диэбитин үөрэ истибиппит .

Ол сонуммутун бэйэбит биир идэлээхтэрбитигэр кэпсээн, өрөспүүбүлүкэ тыатын хаһаайыстыбатынан дьарыктанааччылар үөрэ истибиттэрэ. Онон билигин ити харчыбытын эрэнэ кэтэһэбит. Счеппутугар киирдэҕинэ, былааннаммыт эбии аһылыкпытын, хамнаспытын төлүөхтээхпит.

Елена Тутукарова, кэпэрэтиип салайааччыта.

I Күүлэт