Саҥа оптуобустар Өлүөхүмэҕэ тиийдилэр

Кулун тутар 18 күнүгэр Өлүөхүмэ куорат уулуссаларынан муусука доҕуһуоллаах саҥа оптуобустар маршрутка таҕыстылар.

— Биэс саҥа оптуобустары туттубут. Икки ГАЗель City уонна үс ПАЗ ВЕКТОР Next  оптуобустар, — диир «Куораттааҕы хаһаайыстыбаны туһаныы сулууспата» МАУ дириэктэрэ Валентин Полынскай.

– Бары оптуобустар 2023 сыллааҕы оҥоһуулаахтар Бу олох атын массыыналар: ордук табыгастаах, куттала суох буолууну хааччыйыы ирдэбиллэргэ барытыгар сөп түбэһэллэр. Саҥа оптуобустар биһиги тыйыс килиимэттээх усулуобуйабытыгар эрэбиллээхтэр. Куораппытыгар 6 №-дээх маршруту чөлүгэр түһэрэри былаанныыбыт, ону кытта 2 №-дээх уонна 7 №- дээх маршруттарынан рейстэри эбэргэ былаанныыбыт. Куоракка саҥа тиэхиньикэлэри кэтэспиппит ыраатта. Былырыын оччолорго өссө Ил Түмэн дьокутаатыгар хандьыдаат Алексей Колодезников бу кыһалҕаны быһаарыыга көмөлөһөргө эрэннэрбитэ, онтубут бүгүн олоххо киирдэ. Куораттааҕы автовокзалга куорат дьаһалтата улахан миитин-көрсүһүүнү тэрийэн ыытта.

— Куорат олохтоохторо куоластааһын түмүгүнэн дойду Бэрэсидьиэнин Владимир Путины өйөөтүлэр. Чуолаан, бу кини көҕүлээбит барыгырааматынан куораппытыгар саҥа оптуобустарынан хааччыйыыта ситиһилиннэ. Күүтүүлээх түгэн! Билигин оптуобустары көрөн-истэн, учуокка туруоран, саҥа маршруттарынан үлэлэтэр күүстээх сорук турар, — диир куорат баһылыга Сергей Щебляков.

Санаттахха, Саха сиригэр саҥа тырааныспардары 8 муниципальнай тэриллии ылбыта. Оптуобустар бу күннэргэ Амма, Үөһээ Бүлүү, Горнай, Нерюнгри, Өлүөхүмэ, Сунтаар, Кэбээйи улуустарынан, ону тэҥэ киин куорат тырааныспарын састаабын эбэн, муниципальнай маршруттарга тахсыахтара. Саҥа оптуобустар — ПАЗ-тар,  Газел-лэр уонна КАВЗ-тар.