Саҥа оптуобустар улуустарга эмиэ бэриллиэхтэрэ

Ил Дархан бүгүҥҥү быһа эпииригэр Алдан олохтооҕо эрийэн, билигин Дьокуускайга сүүрэ сылдьар  курдук оптуобустар атын улуустарга бэриллиэхтэрин сөбүн  туһунан ыйытта.

«Уопсастыбаннай тырааныспары саҥадарга анал кирэдиит бэриллэринэн, биһиги РФ Тырааныспарга министиэристибэтин чэрчитинэн үлэлээн, биһиэхэ 400-чэ мөлүйүөн солкуобай бэрилиннэ. Сотору  кэминэн оптуобустар, ол иһигэр Алдаҥҥа,  кэлиэхтэрэ”, — диэтэ Айсен Николаев.

Саха сирин Тырааныспарка уонна суол хаһаайыстыбатыгар министиэристибэтигэр чопчулаабыттарынан, 2024 сыл олунньу 1 күнүгэр диэри 45-тэн итэҕэһэ суох тиэхиньикэни атыылаһыы былааннанар. Бу оптуобустар киирбит сайаапкаларынан көрөн,  кыра куораттарга уонна тыа сирдэригэр бэриллиэхтэрэ.