Саҥа сылы доруобуйаны айгыраппакка көрсүөххэ

Саҥа дьыл кэнниттэн сорохторго өссө биир уоппуска кэмэ наадатын курдук буолар. Тоҕо диэтэххэ, урукку тэтимнэригэр киирэллэригэр доруобуйа туруга уонна уһун өрөбүллэртэн сылайыы-элэйии мэһэйдиир.  Саҥа дьыл бырааһынньыктара биһиги доруобуйабытын, ис турукпутун алдьаппатын туһугар эмчиттэр тугу сүбэлииллэрий?

Туттуна соҕус аһыахха

— Аһара тотуохха диэри аһаамаҥ. Ол кэриэтэ ас эгэлгэтэ ууруллубут бырааһынньык остуолуттан туттуна соҕус, кыра-кыралаан ылан сиэҥ.

— Эттэн оҥоһуллубут бүлүүдэлэри оҕуруот аһын (хортуоппуйтан ураты) кытта дьүөрэлиир ордук.

— Моркуоптаах, хаппыысталаах салааттары эбэтэр быһыллан ууруллубут оҕуруот аһын астына сиэххэ сөп. Биллэрин курдук, Саҥа дьыл остуолугар салаат арааһа остуол хотойорунан ууруллар. Оттон салааттар элбэх майонезтаахтар. Төһө кыалларынан, майонеһы лимон суогунан, сүөгэйинэн эбэтэр оливка арыытынан солбуйа сатааҥ.

— Бырааһынньык киэһэтин уонна түүнүн тухары остуолтан турбакка олорумаҥ, туран хамсанаргытын умнумаҥ. Киһи төһөнөн хамсанар да, куртах аһы түргэнник «буһарар», ол аата куртахха ноҕурууска кыччыыр.

— Гастроэнтерология ыарыылардаах киһи бырааһынньыктар кэмнэригэр да диетатын тутуһуохтаах.

— Тохсунньу 1 күнэ үүнэр түүнүгэр, төһө кыалларынан, 18.00.-19.00 чч. аһаан баран, 12 чааһы чэпчэки сокуусканан көрсөр туһалаах.

— Наһаа элбэх аһылыгы бэлэмнээмэҥ. Сибиэһэй, соторутааҕыта эрэ бэлэмнэммит бүлүүдэлэр астан сүһүрүү кутталын кыччаталлар.

— Өскөтүн аһара аһаан кэбиспит да буоллаххытына, организмҥытыгар ферменнэринэн көмөлөһүөххүтүн сөп.

— Испиирдээх утаҕы нуормаҕыт таһынан испит буоллаххытына, активированнай чох уо. д.а. курдук абсорбеннар абырыахтарын сөп. Ону сэргэ элбэх уу, минеральнай уу, туустаах оҕурсу (маринованнай буолбатах) ороһуола эбэтэр помидор арыгы суурайан кэбиспит электролиттарын чөлүгэр түһэрэргэ көмөлөһүөхтэрэ. Үчүгэйдик утуйуу эмиэ туһаттан атыны аҕалбат.

— Бырааһынньык сарсыныгар организмы успуорт хамсаныыларынан: хайыһарынан, сатыы тэтимнээх хаамыынан уо. д.а. ноҕуруускалаамаҥ. Тоҕо диэтэххэ, сүрэх-тымыр ыарыыларын көбүтүөххэ сөп.

— Саҥа дьыл курдук улахан бырааһынньыктар кэннилэриттэн үксүгэр арыгыттан сүһүрбүт уонна куртах-оһоҕос ыарыылаах дьон элбиир. Тоҕо диэтэххэ, арыгы быары уонна куртаҕы-оһоҕоһу ноҕуруускалыыр.

Арыгыга баттатыыны эбэтэр аһара аһааһыны сэрэтэр аптаах табылыакка суох. Онон, эмчиттэр сүбэлииллэринэн, барыта сөбүн көрөн буолуохтаах.

Организм чөлүгэр түһэригэр туох көмөлөһүөй?

Онуоха аһыыр аспыт кээмэйин аччата түһэр уонна сынньанар хайаан да наадалаах. Ол эбэтэр минньигэһи, бурдук аһы уонна туустаах аһылыгы аҕыйатан баран, сыата суох эти, оҕуруот аһын, эриэхэни, хааһыны, иэдьэгэйи сииргэ сүбэлииллэр. Калий састааптаах бородуукталар организмтан ордук убаҕаһы түргэнник таһаараллар.

Бастатан туран, сибиэһэй ыраас салгын туһата тугунан да кэмнэммэт. Дьыбааҥҥа таах сытыах кэриэтин пааркаҕа, айылҕаҕа сылдьыҥ. Кыһыҥҥы айылҕа ураты салгыннааҕын тэҥэ, настарыанньаны көтөҕөрүн, киһини атын турукка киллэрэрин умнумаҥ. Киһиэхэ салгын тиийбэтэ ыарытыйыыга уонна сэниэтэ суох буолууга тириэрдэр.

Иккиһинэн, быар үлэтин хонтуруоллуохха. Аһылыккыт арааһын фруктанан уонна оҕуруот аһынан байытыҥ. Быарга аналлаах анал битэмиин-минерал комплекса мэһэйдээбэт.

Үсүһүнэн, ууну элбэҕи иһиҥ. Ол эрэн, гааһа уонна ханнык да эбилигэ суох көннөрү ыраас ууну. Сыыһа-халты аһааһын уонна арыгы организмҥа уу баланса кэһиллэригэр тириэрдэллэр, онтон киһи туруга мөлтүүр. Элбэх ууну иһии күннээҕи эрэсиимҥэ түргэнник төннөргө, уу-туус балансын чөлүгэр түһэрэргэ, ону сэргэ аһара аһыыртан туттунарга көмөлөһөр.

Төрдүһүнэн, күннээҕи эрэсиимҥитин сааһылааҥ. Ол аата күнүскэ диэри утуйбакка, урукку оробуочай эрэсиимҥитигэр төннөргө кыһаллыҥ. Үлэҕэ тахсар күҥҥүтүгэр бэлэмнэнэн, утуйарга уонна сынньанарга урукку эрэсиимҥитин тутуһа сылдьыҥ.

Бэсиһинэн, сыалаах аһылыгы уонна испиирдээх утахтары аҕыйатыҥ. Арыгыттан тута аккаастаныахха сөп. Оттон ас рационун сыыйа-баайа уларытыҥ. Аскыт кээмэйин кыра-кыра аҕыйатан, куртах-оһоҕос уруккутун курдук сөптөөхтүк үлэлиирин ситиһэргэ элбэх оҕуруот аһын, фруктаны сиэҥ.

Бу судургу сүбэлэри тутустахха, уһаабыт бырааһынньыгы доруобуйаҕа содула суох аһарыахха сөп. Оччотугар үлэҕэ, үөрэххэ төннүү чэпчэки буолуоҕа.

Кэрэ аҥаардарга сүбэ

Өр кэмҥэ бырааһынньык эрэсииминэн олоруу кэрэ аҥаардар тас көстүүлэрин эмиэ уларытыан сөп. Киһи сирэйин тириитэ «бороҥ», болоорхой өҥнөнөр. Тирии чиккэтэ (упругость) сүтүөн, харах анныгар хараҥа туочукалар тахсан кэлиэхтэрин сөп.

Маннык кыһалҕа суох буолбатын туһугар, бастатан туран, сууккаҕа 7–8 чаастан итэҕэһэ суох утуйуҥ.

Сирэй-харах иһиитин суох гынарга микротоковай терапия көмөлөөх. Маннык терапия ордук убаҕаһы таһаарарга көмөлөһөрүн сэргэ, хаан эргиирин уонна бэссэстибэлэр атастаһыыларын тупсарар. Ол түмүгэр сирэй өҥө тупсар, хараҥа туочукалар сүтэллэр, сирэй испитэ ааһан, тирии чиккэтэ оннугар түһэр.

Тирии сиигин сүтэрбэтигэр (увлажнение) гиалуроновай кислоталаах сыворотканы туттуҥ, ол үрдүнэн хойуу иҥэмтэлээх кириэми хайаан да соттуҥ. Тириини тупсарар сириэстибэлэр көмөлөспөт буоллахтарына, биоревитализация процедурата — косметолог-быраас тириигэ гиалуроновай кислотаны киллэриитэ туһалыан сөп.