Саҥа сылы оһуокайдаан көрүстүбүт

Быйылгы 2025 сыллаах Оһуокайбыт Аар Дархан этээччибит, сүүс сааһыгар үктэнэрэ аҕыйах сыл эрэ хаалбыт ытык киһибит Егор Михайлович Осипов алгыстаах оһуокайынан саҕаланна.

Аҕа саастаах этээччибит билигин да чиҥник сылдьан алгыстаах тылларынан айхаллаан эппититтэн, бары сүргэбит көтөҕүлүннэ. Убайбыт барахсан халлаан хараҥарбытын кэннэ, түөрт аҥаарга барда. Өссө хас да этээччигэ киирэн кынаттаста. Этээччилэр бары саҥа сылга эйэлээх халлааҥҥа үөрэ-көтө олорорбутугар ыҥырдылар, байыастарбыт кыайыы көтөллөөх этэҥҥэ эргиллэн кэлэллэрин түстээтилэр.

Быыһыгар Григорий Павлов сахалыы мааны куолаһынан санаабытын күүһүртэ. Итии буфет үлэлээтэ. Сө култууратын үтүөлээх үлэһитэ, Оһуокай түмсүүтүн бэрэссэдээтэлин солбуйааччы Ирина Васильевна Абрамова өрө көтөҕүүлээхтик тэрийэн ыытта.

Марта Николаева