Саҥа төрөөбүт кырачааннарга мэдиссиинэ көмөтүн боппуруостарын дьүүллэстилэр

Арассыыйа Судаарыстыбаннай думатын доруобуйа харыстабылыгар кэмитиэтин бэрэссэдээтэлин бастакы солбуйааччы Бадма Башанкаев СӨ Доруобуйаҕа харыстабылын министиэристибэтин  кытары мунньаҕы ыытта.

Мунньахха өрөспүүбүлүкэ министиэристибэтиттэн доруобуйа харыстабылын миниистирин солбуйааччы Татьяна Павлова, штаты таһынан кылаабынай неонатолог Василий Прохоров, штаты таһынан кылаабынай педиатр Вера Игнатьева, М.Николаев аатынан Мэдиссиинэ Национальнай киинин Перинатальнай киинин неонатологияҕа солбуйааччыта Саргылаана Алексеева, Мэдиссиинэ булгуччулаах страховкатын территориятааҕы пуондатын дириэктэрин бастакы солбуйааччы Николай Постников кытыннылар.

Министиэристибэ иһитиннэрбитинэн, мунньахха саҥа төрөөбүт кырачааннарга (ол иһигэр, олус кыра ыйааһыннаах уонна болдьоҕун иннинэ төрөөбүт) мэдиссиинэ көмөтүн, өрөспүүбүлүкэҕэ мэдиссиинэ-демография көрдөрүүлэрин, кырачаан оҕо уонна неонатальнай өлүү төрүөттэрин дьүүллэстилэр.

Василий Прохоров эппитинэн, оҕо өлүүтүн аҕыйатар дьаһаллартан биир сүрүннэринэн ыарыыны сэрэтэр тэрээһиннэр, ол иһигэр РС-инфекцияны утары иммунизация,  буолар.

Бадма Николаевич Саха сиригэр оҕо өлүүтэ аҕыйыырын, нэһилиэнньэ элбиирин, төрөөһүн көрдөрүүтэ үрдүгүн (Арассыыйа орто көрдөрүүтүн аһарар) бэлиэтээтэ.