Саҥа үөрэх дьылыгар киирэргэ оскуолалары бэрэбиэркэлээтилэр

Саха сиригэр 2025 сыл балаҕан ыйын 1 күнүттэн 629 уопсай үөрэхтээһин тэрилтэтэ үлэтин саҕалыаҕа. 152 тыһыынчаттан тахса үөрэнээччи үөрэнэ кэлиэҕэ, ол иһигэр 10 тыһыынчаттан тахса оҕо бастакы кылаас боруогун атыллыаҕа.

Роспотребнадзор управлениета иһитиннэрбитинэн, 2024-25 сылларга оскуолаларга куттала суох усулуобуйаны хааччыйыыны бэрэбиэркэлиир 600 тэрээһин түмүгүнэн, санитарнай-эпидемиология сокуонун ирдэбиллэригэр эппиэттииллэригэр 450 дьаһал бэриллибитэ.
Билигин үөрэх тэрилтэлэрэ ол итэҕэстэри туоратан, үөрэх дьылыгар бэлэмнэнии үлэтин түмүктээтилэр. Ол иһигэр, дьиэлэр, уунан хааччыйыы, канализация, сылааһы биэрии систиэмэлэрин өрөмүөннээтилэр, оскуолалар тастарын ыраастаатылар, тупсардылар.
Ураты болҕомто пищеблоктары бэлэмнээһиҥҥэ уурулунна. Ааспыт үөрэх дьылын түмүгүнэн, өрөспүүбүлүкэҕэ уопсай үөрэхтээһин оскуолаларыгар сылаас аһылыгынан хааччыйыы 100 бырыһыан туолбута.