Саҥалыы тыыннаах “Туой Хайа”

Быйыл үгэс буолбут “Туой Хайа” саха эстрадатын ырыатын бэстибээлэ саҥалыы тыыннанан ыытыллыа, кэмэ-кэрдиитэ, ыытыллар сирэ эмиэ уларыйыа. Сүүмэрдиир түһүмэҕэ бэстибээл төрүттэммит сиригэр – Мииринэй Арыылааҕын “Туой Хайа” сынньалаҥ киинигэр – буолуоҕа, оттон сүрүн өттө – Мииринэй  куорат “Триумф” стадионугар.

“Быйыл икки улахан үбүлүөй бэлиэтэнэр – Мииринэй куорат төрүттэммитэ 70 уонна Арыылаах бөһүөлэгэ олохтоммута 60 сыллара. Онон сибээстээн, бэстибээлбитигэр уларытыылары киллэрдибит, – диэн АЛРОСА генеральнай дириэктэрин солбуйааччы Алексей Дьячковскай кэпсиир. – Быйылгыттан куонкуруспутугар биирдиилээн ырыаһыттар, дуэттар уонна кэлэктииптэр эрэ буолбакка, вокальнай-инструментальнай ансаамбыллар эмиэ кыттар буолуохтара. Төһө даҕаны сайыҥҥы уоппуска кэмэ буоллар, өрөспүүбүлүкэ үрдүнэн араас таһымнаах тэрээһин ыытылыннар, куонкурус тэрийээччилэрэ – АЛРОСА Култуураҕа уонна успуорка комплекса – Сахабыт сирин араас муннугуттан 15 киһини сүүмэрдээтилэр. Кинилэри Мииринэй сиригэр-уотугар долгуйа күүтэбит”.

Итини таһынан, быйыл куонкурус сааһынан хааччаҕар уларыйыы киирбит. Ол курдук, 16-ларыттан 40-нарыгар диэри саастаах биирдиилээн ырыаһыттар киирсиэхтэрин сөп. Оттон ВИА-ларга сааһынан хааччах диэн букатын суох, арай 16-ларын ааспыт буолуохтаахтар. Ону сэргэ быйыл бэстибээл 30-ча сыллаах устуоруйатыгар аан бастакытын урукку сыллардааҕы лауреаттар уонна Гран-при кыайыылаахтара кытталлара көҥүллэммит. “Урукку кыайыылаахтарбыт уонна лауреаттарбыт хайдах сайдыбыттарын көрөөрүбүт ити курдук уларытыыны киллэрдибит. Кинилэр бэстибээлгэ кытталлара дьэ көҥүллэннэ. Элбэх лауреат сайаапкатын ыытта. Онон көрөргө-истэргэ интэриэһинэй буолуо”, – диэн Култуура уонна успуорт комплексын дириэктэрин солбуйааччы Ай-Куота Степанова кэпсээтэ.

Куонкурус кыттыылаахтарын от ыйын 9 күнүгэр регистрациялыахтара. Оттон от ыйын 10 күнүгэр киэһэ 18 чаастан “Туой хайа” сынньалаҥ киинигэр бэстибээл арыллыыта буолуоҕа уонна ити күн биирдиилээн ырыаһыттар сүүмэрдэниэхтэрэ.

От ыйын 11 күнүгэр ВИА-лары сүүмэрдиир түһүмэх саҕаланыа, “Туой Хайа” кииҥҥэ ыҥырыылаах артыыстар кэнсиэрдэрэ тэриллиэ. Оттон киэһэ сынньалаҥ киинин иннинээҕи болуоссакка “Доҕордоһуу дискотеката” буолуоҕа.

От ыйын 12 күнүттэн бэстибээл Мииринэй куоратыгар көһүөҕэ. Ити күн Устуоруйа-оҥорон таһаарыы түмэлэ бэстибээл 32 сыллаах устуоруйатын көрдөрөр быыстапканы тэрийиэ. Үөһэ этиллибитин курдук, бэстибээл бэйэтэ “Труимф” стадиоҥҥа буолар. Ол чэрчитинэн араас куонкурус, биктэриинэ, “Маастардар аллеялара” атыы-көрдөрүү баар буолуо. Аны туран, күнүс 16.00 чаастан бэстибээл успуонсардара кэлбит дьоҥҥо барытын босхо лүмэнээтинэн, кыбааһынан күндүлүөхтэрэ. Эмиэ ити чаастан аныгылыы моһуоннаах саха таҥаһыгар, симэҕэр-киэргэлигэр икки тус-туһунан куонкурус ыытыллыа.

Биир дьикти, саҥа сүүрээн – “Туой Хайа” бэстибээл чэрчитинэн “Баттл года” шоу-бырагыраама тэриллиэ. Онно баҕалаах барыта сайаапка биэрэн кыттыан сөп. “Баттл караоке быһыытынан ыытыллыа, ырыа тиэкиһэ улахан экраҥҥа көстүө, ону кыттааччылар да, көрөөччүлэр да – бары ыллыахтара. Бирииһэ – 50 000 солкуобай. Баттл от ыйын 12 күнүгэр киэһэ 17.00 чаастан саҕаланыа”, – диир Ай-Куота Николаевна.

Ити күн киэһэ 19.30 чаастан саха эстрадатын сулустарын кэнсиэрэ буолуоҕа. Сарсыныгар, от ыйын 13 күнүгэр, “Триумф” стадиоҥҥа киэһэ 16.00 чаастан Мииринэй улууһун ырыаһыттара уонна бэстибээл кыттыылаахтара кыттыһан кэнсиэрдиэхтэрэ. Эмиэ ол күн уу анныгар хаалбыт Туой Хайа бөһүөлэгин ахтар-саныыр литэрэтиирэ биэчэрэ буолуоҕа. Поэтесса, прозаик Августина Лонкунова кинигэтэ сүрэхтэниэ. Биэчэргэ билигин Арыылаахха олорор Туой Хайаттан төрүттээхтэр кэлиэхтэрэ. Арыылаах түмэлэ Туой Хайа бөһүөлэгэр анаммыт быыстапканы көрдөрүө.

Бэстибээл сабыллыыта, кыайыылаахтары уонна бастыҥнары бэлиэтээһин киэһэ 17.00 чаастан буолуоҕа.

Быйыл “Туой Хайа” бэстибээл бирииһин пуондата 1 мөлүйүөн солкуобай кэриҥэ. Вокалистар ортолоругар Гран-прини ылбыттар уонна ВИА-ларга кыайбыттар 200 сүүстүү тыһыынча солкуобайы бириис быһыытынан тутуохтара. Лауреаттарга эмиэ харчынан бириэмийэ көрүллүө.

Дьүүллүүр сүбэҕэ Ай-Куота Степанованы уонна Мииринэйгэ биллэр Роза Раянованы таһынан, саха эстрадатын сулустара үлэлиэхтэрэ. Ол иһигэр Владлена Бурнашева-Сахая, “Туой Хайа” 2002 с. кыайыылааҕа Лэгэнтэй, продюсер, мусукаан Антон Иванов.

АЛРОСА экологтара “Зеленый проект 2.0” грант куонкуруһугар сайаапкалары хомуйаллар

АЛРОСА Экологияҕа киинэ “Живые алмазы Якутии” паарканы тупсаран оҥорон эрэгийиэннээҕи бырайыактар граннарын куонкуруһа саҕаламмытын иһитиннэрэр. Куонкурус көмөтүнэн өрөспүүбүлүкэ олохтоохторо айылҕа пааркатын тупсарар этиилэрин киллэриэхтэрин сөп. АЛРОСА хампаанньа бастыҥ экология бырайыагын олоххо киллэрэргэ биир мөлүйүөн солкуобайы биэриэ.

“Араас сэргэх идиэйэни күүтэбит. Баҕар ким эрэ пааркаҕа киирэр ааны, хаартыска түһэр анал сирдэри, киэргэл буолар статуялары-тутуулары, кыылы-сүөлү аһара-уулатар кормушкалары, тыалтан-куустан харыстыыр хаххалары, дьоҥҥо-сэргэҕэ кэпсиир истиэндэлэри, о.д.а. – арааһы бары оҥоруохха сөп, – диэн АЛРОСА Экологияҕа киинин дириэктэрэ Анастасия Габрашитова кэпсээтэ. – Итини таһынан, көҕөрдүү үлэтин ыытыахха, туристарга сырдатар, оскуола оҕолорун үөрэтэр тэрээһиннэри бэлэмниэххэ сөп. Уопсайынан, биһиги ким даҕаны фантазиятын хааччахтаабаппыт. Төһөнөн элбэх киһи бырайыакка уонна волонтер хамсааһыныгар кыттар да, биһиги онтон үөрэбит эрэ. Кыайыылаах дьон бырайыага пааркабытын өссө тупсарыа, дьону-сэргэни угуйарга көмөлөһүө диэн эрэнэбит”.

АЛРОСА хампаанньа “Живые алмазы Якутии” айылҕа пааркатын өйөөбүтэ хас да сыл буолла. Онно як, бизон, таба курдук уонна да атын кыыллар тыыннаах айылҕаҕа көҥүл сылдьаллар. Паарка иэнэ 32 тыһыынча гаа, Мииринэй куораттан 11 килэмиэтирдээх сиргэ баар. Грант куонкуруһун сүрүн соруга – паарка сайдыытыгар аҥаардас профессионаллары эрэ буолбакка, Саха сирин араас муннугар олорор айар дьоҕурдаах араас эмиэ дьону кытыарыы.

Экология бырайыагар кытта сайаапкалары 2025 сыл балаҕан ыйын 30 күнүгэр диэри //eco@alrosa.ru«>eco@alrosa.ru. электроннай аадырыска ыытыахха сөп. кыайыылааҕы икки түһүмэҕинэн быһаарыахтара: бастаан 10 бырайыагы эспиэрдиир хамыыһыйа талыаҕа, ол кэннэ муҥутуур кыайыылааҕы дьон-сэргэ Экология киинин https://vk.com/ecologyalrosa. социальнай ситимигэр онлайн талыа.

“Зеленый проект 2.0.” грант куонкуруһугар Саха сиригэр регистрациялаах, 18 саастарын ааспыт биирдиилээн дьон эбэтэр хамаандалар, ону тэҥэ юридическай сирэйдэр кыттыахтарын сөп. Куонкурус балаһыанньатын сиһилии манна билсиэххитин сөп. Түмүк бу сыл сэтинньитигэр тахсыаҕа.

АЛРОСА экологтара “Зеленый проект” грант куонкуруһун иккис төгүлүн ыыталлар. 2022 сыллаахха “Питомник многолетних растений” диэн бырайыагынан Үөһээ Бүлүүттэн төрүттээх Лидия Алексеева кыайбыта.

Андрей Бочарников, «Кыым» хаһыат саайтыттан